Qırğızstanda rizasızlar ilbaşı sarayı häm parlament binasın basıp aldı

Uzğan yäkşämbedä ütkän saylawlarda çikne uza almawçı säyäsi partiyälär ildä çualışlar kiterep çığardı

1503652
Qırğızstanda rizasızlar ilbaşı sarayı häm parlament binasın basıp aldı

Qırğızstanda 4nçe oktyabr’dä uzğan saylaw näticälärenä rizasızlıq kürsätü çaralarında 1 keşeneñ ğomere özelde, 590 keşe yaralandı.

Demonstrantlar kiçä kiç İlbaşı sarayı häm anıñ êçendä urnaşqan parlament binasın basıp aldı.  

İlneñ Üzäk saylaw komissiyäse 12 partiyäneñ 7%lıq saylaw çigen uza almawın belderde. Şunnan soñ älege firqalärneñ tarafdarları tawış birü näticälären ğamäldän çığaru taläbe belän başqala Bişkäktäge Ala-Too mäydanında cıyıldı.

Poliśiyä 5 meñnän artıq demonstrantnı taratu öçen gaz häm tawış bombaları qullana. Rizasızlar isä tärtip saqçılarına taş häm tayaqlar belän taşlana, yanğın sünderü häm çüp maşinaları belän öslärenä menärgä mataşa. Demonstrantlar, poliśiyäneñ çigenüennän faydalanıp, İlbaşı sarayı häm parlament binasına bärep kerä. Ber öleşe isä säyäsi mäxkümnär totıluçı törmägä taba kitä.

Ala-Too mäydanındağı demonstrantlar köçäytkeçlärdän “İlbaşı sarayın aldıq”, “Almazbäk Atambayev häm Sadır Caparov irekkä çığarılsın” dip qıçqırğalap tora.

Demonstrantlar törmäne basıp alıp, anda utırğan êlekkege ilbaşı Almazbäk Atambayevnı alıp çığa häm teläktäşlärenä tapşıra  

Şul uq waqıtta, İlbaşı sarayınıñ öske qatlarında älegä bilgele bulmağan säbäplär arqasında ut çığa. Yanğın sünderüçelär anı kontrol’gä ala.

Qırğızstan ilbaşı Sooronbay Cäänbekov demonstrantlarnıñ artında toruçı köçlärgä möräcäğat’ itep bolay dide: “Xälneñ tağın da naçarayuına yul quymas öçen barlıq çaralarnı kürdek. Däwlättä häm cämğıyät’tä totrıqlılıq deputat känäfiyennän östenräk”.

Cäänbekov ildäge wäzğıyät’neñ üz kontrolendä buluın äytte. Ul barlıq säyäsi köçlärne ilneñ mänfäğat’lären üzlärenekennän östä totarğa häm qanunnarğa buysınırğa çaqırdı.  

Cäänbäkov waqıyğalarnıñ artındağı säyäsi partiyälärne tarafdarların tınıçlandırırğa, bulğan urınnarınnan yıraqlaştırırğa öndäde.



Bäyläneşle xäbärlär