Törkiyä ministrı Tatarstanda

Törkiyä sänäğat’ häm texnologiyä ministrı Mostafa Varank Tatarstan ilbaşı belän näticäle söyläşü ütkärde

1318061
Törkiyä ministrı Tatarstanda

Törkiyä sänäğat’ häm texnologiyä ministrı Mostafa Varank Tatarstanğa räsmi säfär yasadı. Kiçä ul cömhüriyät ilbaşı Röstäm Minnexanov belän ike aradağı xezmättäşlek mäydannarı xaqında söyläşte.

“Ayıruça xäläl azıq-tölek häm mäğ’lümati texnologiyälär tarmaqlarında bulaçaq xezmättäşlek xaqında näticäle söyläşülär ütte. Monnan soñ bik tiz räweştä yaña investiśiyä mömkinleklären qarap çığaçaqbız,”-dide Varank.

Ministr Tatarstanğa 19nçı Xalıqara maşina tözeleşe kürgäzmäsendä qatnaşu öçen kitte. Anıñ ilbaşı Minnexanov belän oçraşuı jurnalistlar öçen yabıq işeklär artında 45 minut bardı. Söyläşüdän soñ urtaq matbuğat cıyılışı uzdırdılar.

Varank anda Törkiyäneñ Rusiyä belän mönäsäbätlärendä Tatarstannıñ ähämiyätle urın alıp toruın äytte. Ul, tarixi bäyläneşlär tışında, cömhüriyättä 140qa yaqın törek şirkäteneñ 2 milliard 500 million dollar investiśiyäse barlığın da söyläde.  

“Bu firmalar Rusiyäneñ dä, Tatarstannıñ da iq’tisadına faydalı. Törkiyäneñ êksportına da öleş kertä,”-di törek ministr.

Tatarstan ilbaşı Röstäm Minnexanov ta törek şirkätläreneñ cömhüriyät iq’tisadı üseşendä uynağan rolenä iğ’tibarnı cälep itte. Ul Törkiyä ilbaşı Räcäp Tayyip Ärdoğan belän Rusiyä däwlät başlığı Vladimir Putin arasındağı cılı mönäsäbätlärneñ uñay täêsirläre buluın belderde. Minnexanov ike lider quyğan 100 milliard dollarlıq säwdä äyläneşe maqsatın tormışqa aşıru öçen êşläwlären assızıqladı.



Bäyläneşle xäbärlär