Azärbaycan-Rusiyä säwdäsendä uňışlı yıl

Azärbaycan İlbaşı İlham Aliyev 2019nçı yılnıň Rusiyä-Azärbaycan säwdä êlemtäläre cähätennän uňışlı yıl buluın belderde

1316678
Azärbaycan-Rusiyä säwdäsendä uňışlı yıl

Aliyev Azärbaycanğa kilgän Rusiyä Tışqı êşlär ministrı Sergey Lavrovnı qabul itte.

Azärbaycan İlbaşı idaräsennän yasalğan belderügä kürä, Aliyev 2019nçı yılnıň Rusiyä-Azärbaycan säwdä êlemtäläre cähätennän uňışlı yıl buluın, yıl axırına qadär säwdä külämendäge artışnıň 25% bulaçağın belderde.

Transport ölkäsendä dä yaxşı näticälär aluların, yaqın waqıtta Samur yılğasında salınğan küperneň açılaçağın xäterlätüçe Aliyev Rusiyä-Azärbaycan mönäsäbätlärendä dinamizmnıň saqlanıp qaluın citkerde.

Tawlı Qarabax mäs’äläsenä dä tuqtalıp uzuçı Aliyev: "Qızğanıç, bu mäs’älädä iğ’tibarnı cälep itüçe näticä yuq. Monıň da iň möhim säbäbe Ärmänstan citäkçelegeneň näticäsez säyäsäte, bigräk tä Qarabaxnıň Ärmänstanğa qarawı yünäleşendäge açıqlawı. Bu aňlaşılmas açıqlawğa häm sezneň häm dä Awrupa iminlek häm xezmättäşlek oyışmasındağı Minsk törkemeneň başqa il räistäşläreneň yaraşlı räweştä cawap birüenä şatlandım. Bez Awrupa iminlek häm xezmättäşlek oyışmasınıň Minsk törkeme räistäşläre belän xezmättäşlegebezne däwam itäçäkbez. Yaqında Azärbaycan häm Ärmänstan tışqı êşlär ministrları oçraşaçaq. Söyläşülär barışında aktiv qatnaşuığıznı däwam itäçägegezgä ışanam”, - dip äytte.

Tışqı êşlär ministrı Lavrov ta Rusiyä belän Azärbaycan arasındağı säwdä külämeneň tiz artıp, bıyıl 3 milliard dollarğa yaqın bulaçağın belderde.

Rusiyäneň Azärbaycanğa turıdan-turı investiśiyälärneň 1,5 milliard dollar buluın belderüçe Lavrov Azärbaycanda Rusiyä kapitallı 300dän kübräk şirkätneň êşçänlek alıp baruın aňlattı.

Tawlı Qarabax problemasınıň säyäsi çişeleşe öçen äle başqarılaçaq küp êş buluına basım yasawçı Lavrov taraflarnıň Berläşkän Millätlär Oyışması nizamnamäse häm Xel’sinki soňğı aktında belderelgän nigezlärneň qapma-qarşılıqlı äytülärdän taypıluınıň zarurlığın assızıqladı.



Bäyläneşle xäbärlär