Tatarstan ilbaşı Röstäm Minnexanov Änkarada

Tatarstan ilbaşı Röstäm Minnexanov räsmi säfär belän Änkarağa kilde. Jurnalistlarğa ul başqaladan soñ oçraşular öçen İstanbulğa kitäçägen belderde. Ul irtägä İstanbulda uzaçaq Törkiyä – Tatarstan êşlekle forumında qatnaşıp, yaña xezmättäşlär tabarğa tırışaçaq.  Minnexanov Törkiyädäge tatar diasporası belän dä oçraşaçağın xäbär itte. “Törkiyä keçe häm urta êşmäkärlek wäkillärebezne öyrätü programmasına çaqırdı, monıñ öçen räxmät belderäbez. Şaqtıy plannarıbız bar. Sälamätlek mäs’äläsendä dä yaña proyıktlarğa totınabız, näticälären bergäläp kürerbez,”-dide Tatarstan qunağı. Minnexanov Törkiyä êşmäkärläreneñ Tatarstandağı iñ zur investorlar buluın belderde. “Moña bez urtaq tarixıbız, telebez, häm dinebez belän burıçlı. Şuña kürä ber-berebezne yaqınnan küzätäbez häm duslığıbız yöz yıllar däwam itä,”-dip söyläde Tatarstan ilbaşı.

   Minnixanov törek investorların Tatarstanğa çaqırdı. Anda üzlären çit xis itmäyäçäklären assızıqladı.

İlbaşı bügen Tatarstanda Tuğan tel bäyräme buluın da xäterlätte. Ul bu bäyrämneñ tanılğan şağıyr’ Ğabdulla Tuqayğa bağışlanuın belderde. “Bu barı tik tatar xalqınıñ şağıyre häm bäyräme tügel, ber ük waqıtta böten törki dön’yanıñ bäyräme. Bu nisbättän törek millätenä Ğabdulla Tuqayğa ixtiramı häm iğ’tibarı öçen räxmät belderäbez. İstanbulda Tuqay isemendä park bar, Änkarada uramı häm häykäle tora. Bolar öçen bez Törkiyägä räxmätle,”-di Röstäm Minnexanov.

Soñınnan Premyer-ministr Binali Yıldırım Tatarstan İlbaşı Röstäm Miñnexanov belän oçraştı.