Törkiyä-Üzbäkstan: terror belän köräş xezmättäşlege

“İnterpol”nıñ Törkiyä departamentı başlığı Lütfi Çiçäk bu qısada Üzbäkstan êçke êşlär ministrılığınıñ terrorçılıq belän köräş ğomum mödire Oktam Muradov häm “İnterpol”nıñ Üzbäkstan departamentı başlığı Röstäm İsrailov belän oçraştı.

Üzbäkstan êçke êşlär ministrlığınıñ matbuğat ofisınnan yasalğan belderügä kürä, Çiçäk häm yanındağı Törkiyä wäkillege (delegaśiyası) Üzbäkstan iminlek räsmiläre belän ütkärgän oçraşuda taraflar arasında zamança yanawlarğa qarşı köräş xezmättäşlegeneñ üsterelüe mäs’älälären söyläşte.

Belderüdä Üzbäkstan belän Törkiyä arasında säwdä häm iqtisad, turizm, sport, belem-texnika häm mädäniyät tarmaqlarında bulğanı kebek iminlek ölkäsendä dä tığız xezmättäşlekneñ urnaştırıluı äytelde.

Xalıqara terrorçılıq, diskriminaśiya, separatizm, narkotiklar häm keşelär belän qanunsız säwdä kebek cinayätlärneñ artuına iğ’tibar yünältelgän belderüdä bu qısada Törkiyä häm Üzbäkstan iminlek oyışmalarınıñ urtaq êşçänlegeneñ arttırıluınıñ häm xezmättäşlekneñ tağın da yuğarı däräcägä kütärelüeneñ möhimlegenä basım yasaldı.

Qorallı bäreleşlär xökem sörgän Süriyädäge häm Ğiraqtağı (Ğıyraqtağı) terror oyışmaları safında suğışqan şäxeslärneñ tanıqlıqlarınıñ bilgelänelüe, alarnıñ xalıqara êzläw isemlegenä kertelüe häm totqarlanıluınıñ iminlek oyışmalarınıñ häm “İnterpol” xezmätkärläreneñ möhim wazıyfası buluı assızıqlanğan belderüdä bu ölkädä köçlärneñ häm mömkinleklärneñ berläşterelüeneñ, daimi bularaq ike yaqlı mäğ’lümat almaşuınıñ häm terrorçılıq belän köräş öçen urtaq êşçänlek başqarıluınıñ ähämiyätenä işarä itelde.