Üzbäkstan belän Qazaqstan xezmättäşlege arta

Räsmi säfär belän Qazaqstanda bulğan Üzbäkstan İlbaşı Şävkät Mirziyoyevnı Däwlät başlığı Nazarbayev Aqorda ilbaşı sarayında räsmi tantana belän qarşı alğan. Qarşı alu tantanasınnan soñ ike lider üzara häm wäkilleklärara söyläşülär ütkärgän.

İlbaşı Nazarbayev qara-qarşı söyläşüe waqıtında yasağan çığışında, ike il arasındağı säwdä, iqtisad, mädäniyät häm humanitar ölkälärdä mönäsäbätlärneñ tağın da nığuı zarurlığın belderep: “Söyläşülärebezgä başladıq. Üzbäkstan häm Qazaqstannan 500 êşmäkär qatnaşuında êş forumın uzdırabız. Forumda tarixıbızda berençe märtäbä 1 milliard dollar külämendä 75 kileşügä qul quyılaçaq”, - dip äytkän.

Nazarbayev Üzbäkstannıñ uzğan yılda wafat bulğan İlbaşı İslam Kärimov belän nigezen salğan ike yaqlı mönäsäbätlärne üsterergä däwam itäçäklären assızıqlap äytep uzğan.

İlbaşı Mirziyoyev ta, Nazarbayevnıñ uzğan yılda Sämärqand säfäre waqıtında yasağan “awır könnärendä Üzbäkstannıñ yanında bulaçağı” turındağı açıqlawnıñ ike ilne ber-bersenä tağın da yaqınlaştıruına iğtibarnı yünältep: “Soñğı 5 ayda mönäsäbätlärebez tağın da kübräk üseş aldı. Säwdä iqtisadi mönäsäbätlärebez yaña däräcägä kütärelde. Bügenge êş forumında Üzbäkstannan 250 êşmäkär qatnaşa. Qısqa waqıtta töbäk xezmättäşlegenä ähämiyät birelde”, - dip äytkän.