Şanghay xezmättäşlek oyışması ministrları Taşkentta cıyıldı

Şanghay xezmättäşlek oyışmasınıñ Tışqı eşlär ministrları şura cıyılışı Üzbäkstan başqalası Taşkentta başladı.

496763
Şanghay xezmättäşlek oyışması ministrları Taşkentta cıyıldı

Şanghay xezmättäşlek oyışmasınıñ çirattağı başlığı Üzbäkstannıñ Tışqı eşlär ministrı Abdulaziz Qamilov açılışta yasağan çığışında cıyılışta  23nçe-24nçe iyündä Taşkentta ütkäreläçäk Şanghay xezmättäşlek oyışması yuğarı däräcäle oçraşuınıñ kön tärtibe belän qul quyıluı küzdä totılğan dokumentlarnıñ qarap çığılaçağın belderde.

Cıyılışta oyışmağa äğza illär arasındağı mönäsäbätlärneñ wazğiyäte häm perspektivaları belän bu illärneñ oyışma qarşındağı xezmättäşlek mäs’äläläreneñ tikşerelüe belän ber rättän taraflarnı qızıqsındırğan könüzäk häm regional’ mäs’älälärneñ dä quzğatıluı kötelä.

Cıyılışta Rusiyä Federatsiyäse Tışqı eşlär ministrı Sergey Lavrov, Qazaqstan Tışqı eşlär ministrı Erlan Idrisov, Qıtay Tışqı eşlär ministrı Vang Yi, Qırğızstan Tışqı eşlär ministrı Erlan Abdyldaev, Tacikstan Tışqı eşlär ministrı Siraciddin Aslov, Üzbäkstan Tışqı eşlär ministrı Abdulaziz Qamilov belän Şanghay xezmättäşlek oyışması ğomum särkätibe Raşit Alimov häm oyışmanıñ regional’ terrorçılıq belän köräş qorılışınıñ başqarma komitetı direktorı Yevgeniy Sisoyev qatnaşa.

Qıtay, Rusiyä Federatsiyäse, Qazaqstan, Qırğızstan häm Tacikstan tarafından 1996nçı yılda tözelgän Şanghay xezmättäşlek oyışmasına Üzbäkstan 2001nçe yılda quşıldı.

Şanghay xezmättäşlek oyışmasında Hindıstan, Äfğanstan, İran, Mongoliya häm Paqıstan küzätüçe, Belorus, Törkiyä häm Şri Lanka da dialog urtağı bulıp tora.



Bäyläneşle xäbärlär