Gökdäniz Qaradäniz
Töreklär häm tatarlar: urtaq qıymmätlär 30
Urtaq sportçıbız bulğan, Törkiyä milli sportçısı Gökdäniz Qaradänizneñ sport dönyasına häm dä mäğ’nävi dönyağa öleş kertkän xezmätläre turında qısqaça küzätü
Gökdäniz Qaradäniz kem ul? Bu sorawğa cawap yözennän qısqaça yazmabıznı täq’dim itärgä buldıq.
Gökdäniz Qaradäniz - 11.01.1980nçe yılda Törkiyäneñ Giräsun şähärendä tuğan. Kar’erası buyınça üzeneñ uynağan komandalarında urta mäydan poziŝionında xezmät (wazifa) alğan êlekke törek milli futbolçısı. Gökdäniz Qaradäniz futbol uynağan çorlarında Törkiyädä dä häm çit illärdä dä bik küp tuplarnıñ artınnan yögergän fidaqar’ sportçı bularaq tanış. Êlekke törek milli futbolçısına, Rusiyä Prem’er Liga komandasınıñ Tatarstan Cömhüriyäteneñ başqalası Qazanda “Qazan-Rubin” komandası uyınçısı bulırğa nasıyp bula.
Futbolğa “Yaña Yul Sport”ta başlağan Gökdäniz Qaradäniz 1995nçe yılda Trabzonsportnıñ keçkenälär komandasına transfer (sportçınıñ ber sportiv oyışmadan (klubtan) ikençesenä kitüe (‘’satıluı’’)) bulıp küçä. Trabzonsport komandası belän 1997-2008nçe yıl sezonında professional’lekkä adım ata häm şuşı yıllar êçendä 288 matçta uynap – 81 gol kertä.
11nçe mart 2008nçe yılda Rusiyä Prem’er Ligası komandalarınnan Rubin Qazanğa transfer itelä.
16nçı mart 2008nçe yılda Lokomotiv Mäskäw qarşısında berençe räsmi matçına çığa. 90 minutlıq uynağan berençe matçta uq “Zenit-Peterburg” komandasın öçkä ber belän uynap, ike gol kertä.
30 matçnıñ 27sendä uynap 6 gol 1 pas birep, Gökdäniz Qaradäniz sezon axırında Rusya çempionlığın ala. Bu çempionlıq Qazan komandasınıñ tarixta berençe liga çempionlığı bula. Liganıñ iñ yaxşı 33 futbolçısı arasında Gökdäniz Qaradäniz Andrey Arsxavin häm Marko Topiknıñ artınnan liganıñ “İñ yaxşı, aldınğı sul öçençe uynawçısı“ bularaq bilgele bula.
Gökdäniz Qaradäniz - sport dönyasında quyğan xezmätläre aşa ğına tügel, mäğ’näwi dönyağa da öleş kertergä niyät itkän xäyriyäçelärneñ berse bularaq bezgä bilgele. Tatarstannıñ Biyektaw rayonında anıñ iğanäçelege belän tözelüçe “Gökdäniz Qaradäniz”mäçete turında Gökdäniz Qaradäniz tübändägelärne assızıqlap ütte: “Kötelmägän xällär kilep çıqmasa, anı bilgelängän waqıtqa açarbız”, - dip belderde. Ämma qayçan tözelep betäçägen täğayenlämäde. Başlanğan êş-betkän êş,dilär. “Gökdäniz Qaradäniz” mäçeteneñ olı yul buyında buluı da quandıra: küñelendä iman nurı yörtkän härkemgä kön dä Allah yortı yanınnan uzu üze ük şatlıq östi. Ni äytsäñ dä, mäçet ul xalıqnı ruxi yaqtan bergä tuplap torğan märkäz ,yäş’lärebezgä äxlaqıy tärbiyä birü üzäge. ”Qazanda 10 yılğa yaqın waqıt yäşim. Minem öçen Tatarstan zur rol’ uynıy. Qazanda mäçet tözü miña möhim. Bu üzenä kürä ber büläk bulır”, - dide sportçı. Alğa taba tormışığıznı Qazan belän bäylärgä telisezme digän sorawğa ul: ”Xäzer Qazanda yäşim. Alğa taba qayda yäşärbez - belmim. Allah qaya nasıyp itsä, şunda yäşärgä yazsın”, - dide Gökdäniz Qaradäniz.
Qazannıñ “Rubin” futbol komandası üzeneñ 60 yıllığın bilgeläp ütäçäk, dip belderä “Tatar-inform” xäbärçese Gölnar Ğarifullina. Milli muzeyda oyıştırılğan kürgäzmädä Tatarstannıñ êlekke çorlardağı sport qazanışlarınnan qala,Tatarstan sport klubları häm sportçıları soñğı yıllarda yaulağan bilgele sport trofeyları,”Rubin” futbol klubınıñ töp qazanışları, şulay uq Gökdäniz Qaradänizneñ şäxsi äyberläre täq’dim itelgän ide. Monnan tış futbol uyınçısı Tatarsan Milli muzeyına üzeneñ “61” tamğalı futbolkasın büläk itte: ”Milli muzeyğa futbolkamnı büläk itep qaldıruıma şatmın, bu bit tarixqa kerep qalaçaq”,- dide Gökdäniz Qaradäniz.
“Tatar-inform” xäbärçesenä, “Rubin” uyın komandasınıñ yarımsaqçısı Gökdäniz Qaradäniz tübändägelärne söyläde: ”Tatarstanda ütkän här könem miña möhim buldı, Qazanda yäşäwem belän bäxetlemen. ”Rubin” komandasında uynağanıma da un yıl ütep kitkän, bu minem öçen zur êtap bulıp tora. Älbättä, minem yoldızlı säğatem “Rubin” komandasında başlandı, min şuşı un yılda, futbolist bularaq, üzemne tiyeşle däräcädä kürsätä aldım dip uylıym. Uynağan waqıtımda minem teräk-tayanıçım äti-äniyem, ğailäm, duslarım, canatarlarım buldı, alar minem öçen çın-çınlap can attı. ”Rubin”nıñ xäzerge waqıtta bulğan näticäläre minem şäxsi uñışlarım ğına tügel, bu berböten komandanıñ uñışı”, - di Gökdäniz Qaradäniz.
Gökdäniz Qaradäniz kiläçäktä dä törek-tatar sportı öçen äle küp yıllar xezmät itär. Alğa taba da anıñ zur uñışlarğa ireşep tatar häm törek milläten söyenderer digän teläktä kalabız.
Törle çığanaqlardan tuplap äzerläwçe Kädriyä Mäyvacı
Çığanaqlar:
1)Gölnur Ğarifullina,”Tatar-inform”,Qazan,30.09.2016
2)https://www.biyografi.net.tr>gokdeniz-k....
Gökdäniz Qaradäniz kimdir-Biyografi.net.tr
Fotosürät tatarstan.ru säxifäsennän alındı.
