Qamil xäzrät Sämigullin
Töreklär häm tatarlar: urtaq qıymmätlär 22
Tatarstan Diniyä näzaräte räise, möselman din êşleklese Qamil xäzrät Sämigullin xaqında qısqaça küzätü
Möselman din êşleklese, Tatarstan Cömhüriyäteneñ Dini İdarä räise, möfti Kamil İskändär ulı Samiğullin 1985nçe yılnıñ 22nçe martında Mari Cömhüriyäte Krasnogor toraqlığınıñ Zvenigob rayonında tuğan. Kamil xäzrät - Rusiyädäge berdänber xafız- möfti. Xänäfi häm maturudi mäzxäbennän uqımışlı ğalim. Ul Tatarstan Diniyä Näzaräteneñ Ğolämälär şurası äğ’zası. Qazandağı “Möxämmädiyä” mädräsäse direktorı, Rusiyä İslam universitetı möğallime. Tatarstanda iñ yäş’ möfti bulğan keşe.
Kamil xäzrät 2000 nçe yılda Voljesk şähärendä tuğızınçı sıynıfnı tämamlağannan soñ Qazanda “Möxämmädiyä” mädräsäsenä uqırğa kerä. Tatar din ähelläre Ğabdulla Samatov häm Wäliulla xäzrät Yakupovtan dini täğ’limatlar, dini däreslär ala.
2003nçe yılda Maxaçkala şähäreneñ Tön’yaq Kavkaz İslam Universitetına uqırğa kerä. Ber yıl bu uqu yortında uqığannan soñ universitetnıñ akademik yalın alıp 2003-2004nçe yıllarda Törkiyä Däwläteneñ İstanbul şähärendä urnaşqan “İsmağıyl’ ağa” mädräsäsendä ğıylem ala. Mädräsädä şäyex Maxmud Al’-Ufidan däreslär alğan Kamil Samiğullin, bu mädräsädä belem alu tanıqlığına iyä bulıp, 2007-2008nçe yıllarda Tömän ölkäse Tübän Vartov rayonınıñ ber bistäsenä imam bulıp urnaşa.
2008nçe yılda Qazan şähäreneñ Mirnıy (Tınıçlıq) bistäseneñ “Tınıçlıq” mäçetenä imam bulıp saylana.
2011nçe yılda Tatarstan Möselmannarınıñ Diniyä Näzaräteneñ näşriyat bülegen citäkli. 2012nçe yılda Tatarstan Möftiseneñ ğıyl’mi êşlärdän cawaplı urınbasarı itep bilgelänä. 2013nçe yılda inde anı Tatarstan Cömhüriyäteneñ Diniyä Näzaräte başlığı, yağ’ni Tatarstan Möftise itep saylıylar.
Kamil xäzrät Samiğullin - tatar, urıs tellärennän tış, ğaräp, törek, iske tatar tellären dä belä. Kitap uqırğa yarata,iske-tatar dini miraslar belän mawığa,islam ğalimnäreneñ xezmätläre östendä êzlänülär alıp bara.
Yäş’üsmer çağında futbol, taêkwando, çañğı sportı belän şöğıl’länä.
“Din keşelärgä ülgändä genä tügel, yäşägändä dä bulışırğa da tiyeş. Şuña kürä futbulğa häm ğomumän sportqa min uñay qarıym. Sport, şul isäptän futbol da, xalıqqa fizik häm ruxi yaqtan tärbiyäwi mäğ’nä birä”,- di Kamil xäzrät Samiğullin.
2015nçe yılnıñ 15nçe fevralendä Törkiyä başqalasında Tatarstan Möftise Kamil xäzrät Samiğullin Törkiyäneñ 2015nçe yıldağı Diyanät êşläre citäkçese, professor Mäxmät Görmäz belän oçraşa. Oçraşuda din ähelläre dini belem mirasın öyränü ölkäsendä urtaq plannar turında söyläşä. Tögälräk äytkändä, süz Qor’änneñ “Qazan basması”n çığaru turında bara. İzge kitapnıñ yaña nösxäse Törkiyä Cömhüriyäte Diyanät êşläre citäkçelege sorawı belän tanılğan kalligraf Möxsin Dämiräl tarafınnan näsx stilendä êşlänä. Monnan tış oyışmalarnıñ fän, mäğarif häm kitap bastıru ölkälärendä ber-berlärenä yärdäm itü mäs’äläläre dä quzğatıla.
Oçraşu näticäsendä İske kitaplarnı häm qul’yazmalarnı öyränü üzäge buldırırğa kiräk digän fikergä kilenä (ayırım alğanda tatar dinçeläreneken). Mäğ’lüm bulğança, xäzerge waqıtta dönyanıñ törle illärendä tatar ğalimnäreneñ meñlägän xezmätläre saqlana. Häm alarnıñ kübese xäzerge zaman telenä küçerelmägän. Şunısı da bilgele: qayber kitaplar berär danädä genä saqlanıp qalğan.
Dus häm qärdäş il bulğan Tatarstan delegaŝiyäse belän öçraşudan böyek ber qanäğat’lek xisläre kiçergänlegenen belderde Törkiyä däwläteneñ 2015nçe yılğı Diyanät êşläre citäkçese. Oçraşuda Tatarstan Möftise K.Samiğullin da (maxsus bastırılğan) Ğabdennasıyr Qursawinıñ kitapların büläk itte. “Bu oçraşu faydalı êlemtälärgä häm kürkäm başlanğıçlarğa bik bay säfär buldı”- dip belderelä “Änkara İhlas” xäbär agentlığı yazmasında.
Tatarsan Cömhüriyäte Möftise Kamil xäzrät Samiğullin Tatarstannıñ törle cirlärendä bulıp uzğan iftar mäcleslärendä jurnalistlarnıñ sorawlarına cawap birep, tübändägelärne söyläde: ”Xäzerge waqıtta iske tatar kitapların yañadan bastırabız. Misal öçen 100 yıl êlek “Şura” digän jurnal çığıp kilgän. Bez anı xäzerge waqıtta yañadan bastıra başladıq. Monda bezneñ fikerlärebez, äzer wäğazlärebez, Xänäfi mäzhäbebezneñ dälilläre urın alaçaq. Bu jurnal älegä Tatarstan mäçetlärendäge imamnarıbızğa birelä torğan jurnal bulaçaq. Jurnalda comğalarda mäçetlärebezdä uqılaçaq berdäm wäğazlär dä basılaçaq”, - dip belderde.
Kamil xäzrät Samiğullin üzeneñ çığışında Tatarstan Möftiyäteneñ bigräk tä soŝial’ xezmätlärgä, xalıqqa tatar din ähelläreneñ mirasın qaytaruğa zur östenlek birüen dä bilgeläp ütte.
Törle çığanaqlardan tuplap äzerläwçe Kädriyä Mäyvacı
Çığanaqlar:
1)Kamil xäzrät Samiğullin:Sezneñ cirlärdä Qor’än iñgän,ä beznekendä-basılğan”.
20.02.2014
2)Tatarstan Dini İdare Başkanlığından Diyanet’e Ziyaret.-Ankara-İhlas Haber Ajansı.15.02.2015
