Tatarlar cämğiyäte başlığı Bähzat Aqtaş wafat / Тaтaрлaр җәмгыятe бaшлыгы Бәһзaт Aктaш вaфaт
İzmir Tatarlar cämğiyäte başlığı Bähzat Aqtaş wafat buldı / Измир Тaтaрлaр җәмгыятe бaшлыгы Бәһзaт Aктaш вaфaт булды
ТӨРКИЯДӘН ТAТAРЧA ТAПШЫРУ / TÖRKİYÄDÄN TATARÇA TAPŞIRU 13.11.2021 14:00 PODKAST
2021nçe yılnıñ 7nçe noyabr’ könne Törkiyäneñ İzmir qalasında ğomer itüçe millättäşebez, dönya tatar diasporasına yaxşı tanış bulğan milli canlı Bähzat Aqtaş wafat buldı.
Ulı Bahadir qayğılı xäbärne: “Ätiyem bügen irtä belän ozaq waqıttan birle qarşı torğan yaman şeş awıruına ciñelde häm wafat buldı”, - süzläre belän citkerde.
Bötendönya Tatar Ligası, Aqtaş ğailäse belän İzmir häm İskeşähär tatar cämğiyätläreneñ qayğısın urtaqlaşıp: “Bähzat Aqtaş çın tatar patriotı, watanpärwäre ide. Tatar milli üzañın häm mädäniyäten yäşätü mäs’äläsendä härwaqıt bik aktiv ide. Yuqlığın xis itäçäkbez. Urını cännät bulsın”, - dip belderü yasadı.
Jurnalist Ruşaniya Altay: “Törkiyä millätçe ber tatar keşesen, İzmir tatar oyışması räise Bähzat Aqtaşnı soñğı yulğa ozata. Aña äle nibarı 69 yäş’ ide. Läkin üpkäsendäge yaman şeş yäşenä qarap tormadı”, - dip xäbär itep, Bähzat äfände turındağı xatiräläre belän bolay dip urtaqlaştı:
“Bähzat abıynıñ tawışın, min üzen äle tanımağan kileş, 1991nçe yılda uq işetkän idem. Törkiyägä berençelärdän bulıp uqırğa kitkän kurstaşım Säğit Xäyri anıñ belän äñgämä qorğan häm audiokassetasın Tatarstan radiosına cibärgän ide. Rasşifrovkasın yasağanda anıñ matur ahänle tawışın, çit ildä tuıp üsep tä bik matur tatarca söyläşüen soqlanıp tıñlağan idem.
Min Törkiyägä uqırğa kilgän yıllarda ul Antaliyada yäşi, anda kömeş yuvelir kibete tota ide. Annarı İzmirgä küçende.”
Bähzat äfändeneñ böten tatar çaralarında aktiv qatnaşuın iskärtep uzuçı Ruşaniya Altay: “Anıñ belän bergä İzmirdä berençe tapqır Tuqaynı iskä alu cıyının oyıştırdıq, anıñ belän bergä İzmirdä berençe tapqır tatar xalıq aşları bäygesen ütkärdek, Tatarstan kiçäsen uzdırdıq”, - dip iskä töşerde.
Ruşaniya xanım beldergänçä, ideyaläre taşıp torğan Bähzat äfände Törkiyädäge tuğan awılı Osmaniyädä Söyembikägä häm möhacir tatarlarğa häykäl salu, awılnı tatarlıq belän bäyle turistik üzäkkä äyländerü xıyalları belän yanıp yäşäde. Ulı Bahadir äytkänçä, äle urın östendä dä tatarlıq belän bäyle êşlise êşläre turında söyläşep, plannar qorıp yatqan.
Bähzat abıynıñ xatını Gölsar apanıñ da bik tatar canlı keşe buluın, ikeseneñ Ämrä häm Bahadir isemle ike malay üsterüen häm alarnıñ da bik yaxşı tatarca söyläşüen añlatuçı Ruşaniya Altay: “Bar bulıp toruıñ ğına da citä ide, Bähzat abıy. Awır tufrağıñ ciñel, urınıñ cännättä bulsın”, - dip yazdı.
Märxüm 8nçe noyabr’ düşämbe könne tuğan yağında, İskeşähär vilayäteneñ Qorıxöyek (Osmaniye) tatar awılında cirlände.
Soñğı yulğa ozatu cıyınında Tatarstannıñ Törkiyädäge tulı wäqalätle wäkile Ayrat Ğataullin da qatnaştı. Ul Tatarstan Baş ministr urınbasarı, Bötendönya tatar kongressınıñ Milli Şura räise Vasil Şäyxrazıyevneñ qayğınamäsen citkerde.
Qayğınamä xatında bolay diyelä:
“Tatar dönyası zur yuğaltu kiçerä. Ğomeren xalqıbızğa xezmät itügä bağışlağan tatar xalqınıñ kürenekle ulı, ğayär’ häm fidaqar’ şäxes, cämäğät êşleklese, ozaq yıllar däwamında Törkiyäneñ İzmir şähäre tatar üzägen citäklägän Bähzat Aqtaş baqıylıqqa küçte.
Millätebez öçen Bähzat ağanıñ vafatı zur yuğaltu.
Bötendönya tatar kongressı Milli Şurası anıñ ğailäseneñ, tuğannarınıñ, yaqınnarınıñ häm barlıq millättäşlärebezneñ tiran qayğısın urtaqlaşa, Allahtan sabırlıq sorıy.
Ruxı şat, urını cännättä bulsın”
Särdar Aqtaş fotosürätläre
2017nçe yılnıñ avgust ayında Tatarstan başqalası Qazanda ütkärelgän Bötendönya tatar kongressınıñ 6nçı qorıltayında Törkiyädän qatnaşqan Bähzat Aqtaşnıñ ul çaqta “Törkiyä awazı” öçen urtaqlaşqan uy-fikerläre belän videoyazmadan tanışa alasız.
