İdel-Ural tormışında Rämiyevlär ğailäse

İstanbulda Därdmänd häm Rämiyevlär ğailäse iskä alındı

İdel-Ural tormışında Rämiyevlär ğailäse

2019nçı yılnıň 21nçe noyabr’ könne İstanbuldağı Märmärä universitetında tanılğan tatar şağire (şağıyre) Därdmänd iskä alındı.

Muzıkant Äminä Aygistovanıň tatar şağire Därdmändneň “Kalämgä xitab” şiğirenä icat itkän cırın Başqort däwlät opera häm balet teatrı cırçısı Marat Şäripov başqarğan konferenśiyädä Törkiyäneň Tatarstandağı êlekkege baş konsulı Turxan Dilmaçnıň Tatarstanğa bağışlanğan fotosürätlär kürgäzmäse dä täq’dim itelde.

Tatar şiğ’riyäteneň kürenekle wäkile, fälsäfäçe Därdmändneň (Möxämmätzakir Rämiyevneň) tuuına 160 yıl tulu uňayınnan oyıştırılğan fänni cıyın “İdel-Ural törkiläreneň ictimağıy häm mädäni tormışında Rämiyevlär ğailäseneň totqan urını” dip atalğan.

Märmärä universitetı qarşındağı Törkiyät tikşerenüläre institutı mödire Okan Yäşilot açıp cibärgän fänni cıyında Tatarstannıň Törkiyädäge tulı wäqalätle wäkile Ayrat Ğataullin da konferenśiyädä qatnaşuçılarğa uňışlar teläde.

Märmärä universitetı Törki dönyanı tikşerenülär institutı xezmätkäre, tarix häm politologiya fäne belgeçe, konferenśiyanıň koordinatorı Läysän Şahin Rämiyevlär ğailäse turında söyläde.

Tanılğan xäyriyäçe Şakir häm Zakir Rämiyevlärneň Törkiyädäge näsel däwamçısı, ädäbiyat ğalime häm yazuçı Gönül Pultar Sovetlar Berlegendäge iň berençe bulıp êlektron xisaplaw maşinasın uylap tabuçı keşeneň Rämiyevlär näselennän – şağir Därdmändneň onığı buluın açıqladı. Gönül xanım üzeneň çığışında Rämiyevlär ğailäseneň näsel şäcäräse belän tanıştırdı.

Finlyandiyädä yäşäwçe millättäşebez Okan Dahär şağirneň ulı Ğarif Rämiyev turında söyläde. Ul Därdmänd yäğ’ni Zakir Rämiyevneň ulı Ğarif Rämiyevneň uquçısı buluın, ğaräp xärefläre belän tatarça uqıy-yazarğa annan öyränüen aňlattı. Ğarif Rämiyevneň suğıştan soňğı yıllarda Finlyandiyädä yäşäwen, andağı tatar balaların uqıtuın äytüçe Okan äfände Ğarif Rämiyevneň Finlyandiya tatarları tarixında zur urın totuın bilgeläp ütte.

Fänni cıyında Tatarstannan qatnaşqan ğalim Marat Ğibatdinov “19nçı ğasır axırı belän 20nçe ğasır başında tatarlarda mädäniyät häm mäğarif üseşe” digän temağa çığış yasadı.

Tatarstan ğalimäse Lälä Mortazina 20nçe ğasır başı tatar tormışında bertuğan Rämiyevlär häm alarnıň ğailä äğ’zalarınıň tatar mäğarifenä kertkän xezmätläre xaqında mäğ’lümat birep uzdı.

Törkiyäneň İnönü universitetı filologiya fännäre professorı Ramilä Yarullina Yıldırım Därdmänd icatında häm şiğirlärendä tuğan il häm millät töşençäläre turında çığış yasadı.

Qavqaz universitetı dośentı Çulpan Zaripova-Çätin “Därdmänd icatında könçığış häm könbatış fäksäfäse sintezı” dokladın täq’dim itte.

Änkaradan kilgän yäş’ tatar ğalime İl’yas Miftaxov “Rämiyev bertuğannarnıň tatar matbuğatın üsterügä kertkän xezmätläre” digän temağa çığış yasadı.

Başqort däwlät opera häm balet teatrı cırçısı Marat Şäripov Därdmändneň Başqortstan häm tatar dönyasında totqan urını belän tanıştırdı.

İstanbuldağı fänni cıyında Rämiyevlar näseleneň yäş’ buın wäkilläre, tuğannarı da qatnaştı.

Rämiyevlar ğailäseneň tuğannarı buludan şat buluın häm näselläreneň bik bay tarixqa iyä buludan ğorurlanuların äytüçe Svetlana xanım bügenge oçraşunıň ğailä äğ’zalären berläşterü belän ber rättän mäşhür näselneň qimmäten böten dönyağa taratuın belderde.

Rämiyevlar näsele turında babayınnan öyärüennän aňlatuçı Êl’mira xanım öydä Därdmändneň äyberläreneň saqlanuın, äbiseneň Därdmändneň bişek cırın cırlawın, şuşı räweşle keçkenä çaqtan uq tatar mädäniyäten üzläşterüen äytte.

Rämiyevar tuğannarı İstanbuldağı konferenśiyädä qatnaşudan häm başqa tuğannar belän tanışudan bik şat buluların belderde häm fänni cıyınnı oyıştıruçılarğa räxmätlären citkerde.

 

 
 
 
 


Bäyläneşle xäbärlär