“Bu xanımnar tatar millätenä xezmät itkän”
Törkiyä başqalası Änkarada “Millät anaları” fänni cıyını uzdı
Ayaz Tahir Törkistan İdel-Ural waqıfı binasında ütkärelgän cıyında tatar xanımnarı Mäxbübcamal Aqçurina, Şäfikä Ğaspralı häm Säğadät İsxaqıy-Çağatay turında süz bardı.
Ädäbiyat belgeçe Roza Qorban “Tuuınıň 150 yıllığında yazuçı häm pedagog Mäxbübcamal Aqçurina” dokladı belän çığış yasadı.
Mäxbübcamal Aqçurinanıň üz balaları bulmasa da gel balalarnı uqıtuğa ähämiyät birüen assızıqlawçı Roza xanım pedagogika belän bäyle küp kenä yazmalarınıň “Şura” jurnalında basıluın häm küp êş başqarsa da anın çıqqan yazmalarınıň älläni bilgele bulmawın belderde.
“Bu xanımnar tatar millätenä xezmät itkännär, millätneň kiläçäge öçen köräşkännär. Ägär balalarıbız belem almasa, millätneň üseşe dä bulmıy. Millätne üsterü, kiläçäkkä alıp baru öçen uqığan, belemle keşelär kiräk digän fikerdä torgannar”, - dip fikerlären citkerde Roza Qorban.
Xacı Bayram Wäli universitetı uqıtuçısı, qırım tatarı Işılay Sava İsmäğil Ğaspralı qızı Şäfikä Ğaspralı turında mäğ’lümat birep uzdı. İsmäğil Ğaspralı xatını Zöhrä xanım qazan tatarı bula. Yosıf Aqçuranıň ceňlese.
“Ayaz Tahir Törkestan İdel-Ural” waqıfı başlığı, fän doktorı Tülay Duran Ğayaz İsxaqıynıň qızı ğalimä Säğadät Çağatay häm anıň fondnı oyıştıru turında çığış yasadı.
Älege fond-waqıf 1988nçe yılda Çağatay tarafınnan oyıştırıla. Uquçı yäş’lärgä stipendiya birüçe waqıf “Yaş’ Törkestan” digän jurnalnı kitap itep çığardı.
Säğadät Çağatay belem aluğa zur iğ’tibar birgän. Ul Germaniyädä uqığan. İke universitet tämamlağan. Törkiyädä professor däräcäsenä qadär kütärelä. “Çağataynıň alman telendä yazılğan köndälekläre bar. Alarnı tärcemä itep bastıru kiräk”, - dide Tülay xanım.
Törkiyädä yäşäp wafat bulğan tatarlarnı iskä alu çaraları qısalarında oyıştırılğan “Millät anaları” çarasına uqıtuçılar, jurnalistlar, uquçı yäş’lär dä kilde. Qazan tatarları, qırım tatarları, uyğırlar, töreklär dä qatnaştı. Başqa şähärlärdän kilüçelär dä buldı.
Cıyınnan videoyazmanı seber tatarı Mostafa Gültäkin töşerep cibärde.
