Törkiyädä tatar awılında Sabantuy
2019nçı yılnıñ 23nçe iyün’ yäkşämbe könne Törkiyäneñ İskeşähär vilayätendä urnaşqan Osmaniye-Qorıhöyük tatar awılında sabantuy ütkärelde
Tatarstannıñ Törkiyädäge tulı wäqalätle wäkilçelegeneñ yärdäme belän İskeşähär Qazan tatarları mädäniyät häm yärdämläşü cämğiyäte oyıştırğan milli cıyında İskeşähär, Kütah’ya, Kon’ya, Änkara häm başqa yaqlardan kilgän tatarlar qatnaştı.
Biredäge tatar awılında tuıp üskän Xäyrullah Aqalay xäzrät Sabantuy cıyının doğa belän açıp cibärde.
Tatarstan Cömhüriyäteneñ Törkiyä Cömhüriyätendäge wäqalätle wäkile Ayrat Ğataullin ilbaşı Röstäm Miñnexanovnıñ qotlawın citkerde.
Tatarstan sänğätçeläre tatar cır-biyülären başqarğan cıyında 2016nçı yılda Tatar yäş’läre forumında Törkiyädän qatnaşqan Säray Ärdoğan ätiseneñ tuğan awılında tatar cırların cırladı.
Uzğan yıldağı kebek bıyıl da Osmaniye-Qorıxöyek tatar awılındağı sabantuyında millättäşebez Murat Yumrutaşnıñ äydäp baruçanlığındağı Änkara velosiped häm tabiğat’ sportları cämğıyäte wäkilläre qatnaşıp, awıldağı borınğı qaber taşlarına barıp, äbi-babaylarnıñ ruxına doğa qıldı.
Törle bäyge-yarışlar ütkärelgän Sabantuy ğadättägeçä Ğabdulla Tuqaynıñ “Tuğan tel” cırı belän tögällände.
Mustafa Gültäkin fotosürätläre
