İstanbulda häm Antaliyada Sabantuylar
2019nçı yılnıñ 16nçı iyün’ könne İstanbulda häm 23nçe iyün’ könne Antaliyada Sabantuylar buldı
2019nçı yılnıñ 16nçı iyün’ könne İstanbul qalasında Sabantuy ütte.
Milli cıyınnı Tatarstannıñ Törkiyädäge wäkilçelege, İstanbuldağı “İdel-Ural törkiläre mädäniyät häm yärdämläşü cämğiyäte, Tatarstan säwdä yortı oyıştırdı.
2019nçı yılnıñ 23nçe iyün’ yäkşämbe könne isä Törkiyäneñ Urta diñgez buyındağı Antaliya qalasında ike Sabantuy cıyını uzdı.
Berse “Pal’malar astında Sabantuy” cıyını Antaliyadağı Mäskäw xalıqara mäktäbeneñ stadionında köndez ütkärelde.
Kiçke säğätlärdä isä Antaliya qalasında ikençe sabantuy uzdı. “Lemon Park House”ta oyıştırılğan cıyında da tatar-başqort cırları cırlandı, biyülär başqarıldı, bäygelär uzdırıldı.
Tatarstan, Başqortstan, Êstoniya, Ukraina, Qavqaz töbägennän dä tatarlar kilgän cıyınnı Fänis Zıyalı alıp bardı.
Lira Ğaynetdinova häm Linar Xaciyev da alıp barğan häm Tatarstannan cırçılar Nurzadä, İlgiz Şäyxraziyev, şağirä Yoldız Şäräpova qatnaşqan cıyında İzmir tatarları cämğiyäte başlığı Behzat Aqtaş da çığış yasadı.
