“Keşelärgä maturlıq kilsen öçen…”
“Törek wä tatar dönyasında” tapşıruı. 05.04.2017
“ArtAnkara” zamança sänğät yärminkäsendä tatar xatın-qız rässamnäre
Törkiyä başqalası Änkarada 3nçe Zamança sänğät yärminkäse oyıştırıldı.
Räsemnän alıp häykälgä, fotosürättän alıp keramikağa qadär zamança sänğätneñ iñ yaña häm qimmätle ürnäkläre täqdir itelgän “ArtAnkara” xalıqara sänğät yärminkäsendä 20 ildän yözlärçä sänğätçe qatnaştı.
Änkara säwdä palatasınıñ “Congresium” üzägendä 2017nçe yılnıñ 16nçı-19nçı mart könnärendä açıq bulğan xalıqara yärminkädä tatar xatın-qız rässamnäre dä üz äsärlären täqdim itte.
Yärminkägä İdel-Ural yaqlarınnan, Öfe qalasınnan kilgän Êl’za Näfıykova, peyzajlarnı häm matur keşelärneñ räsemnären yasarğa yaratuın äytte. Keşelärgä maturlıq kilsen öçen icat itülären assızıqlap, Törkiyä tatarlarına häm törek qardäşlärebezgä mäxäbbät häm matur tormış teläklären citkerde.
Qazanda tuıp üskän häm Perm’ sänğät akademiyasın betergän Aygöl Okutan isä 10 yıl İstanbulda yäşäwen, İstanbulnı häm Törkiyäne bik yaratuın äytte häm biredä bu qadär zur külämle sänğät yärminkäsendä, kürgäzmäsendä qatnaşuınnan bik şat buluın belderde:
“Çınnan da bik güzäl sänğätçelär bar. Häm professional’, häm tös, texnika ısulları, atmosfera, ênergiya – barısı da ışanmaslıq däräcädä iskitkeç matur.”
Fevral’ ayında Änkarada oyıştırılğan başqa ber kürgäzmädä dä qatnaşuın äytüçe Aygöl Okutan läkin biredä üzen tağın da bäxetleräk xis itüen, bik uñay, pozitiv ênergiya kürüen assızıqlap äytep uzdı.
Törkiyä tatarları belän dä tığız êlemtädä buluına basım yasawçı Aygöl Okutan:
“Tatarlar belän küreşäm. Bik köçle cämğiyäte bar, diasporası bar İstanbulda. Tatarlar Törkiyädä üzlären öydäge kebek xis itälär. Din ber ük, telläre dä oxşıy. Här yıl Sabantuy bäyräme uza, gel anda barabız. Tatarça konśertlar bula.
Küptän tügel bik qızıqlı kürgäzmä ütkärdek: ber başqort, ber udmurt häm min tatar rässame. Barıbız da İstanbulda yäşibez. Öçebez dä sänğätçe. Urtaq yağıbız bar. Şuşı räweşle berlek yasarğa telibez,”- dip äytte.
3nçe “ArtAnkara” xalıqara zamança sänğät yärminkäsendä qatnaşqan tatar xatın-qız rässamnäre Êl’za Näfıykova häm Aygöl Okutan belän äñgämäne videoyazmadan qarıy alasız yäki TAWIŞ uynatqıçınnan tıñlıy alasız.
Ğabdräşit İbrahimneñ 1nçe Bötendönya suğışında Weinberg äsirlär lagerındağı imam wazıyfası
Uzğan yazmalarıbızda da xäbär itkänebezçä, Törkiyä başqalasında tanılğan tatar säyäsätçese häm din ähele Ğabdräşit İbrahim tormışı, äsärläre häm başqarğan êşçänlege belän iskä alındı.
Uzğan yazmada bez Änkara universitetında Tokio mäçete häm qolliyäseneñ 80 yıllığı mönäsäbäte belän ütkärelgän 4nçe Xalıqara Ğabdräşit İbrahim simpoziumı turında süz alıp barğan idek häm xalıqara fänni cıyınnı oyıştırğan Änkara universitetı qarşındağı Aziya-Tın okeanı êşçänlege ğamäli häm tikşerenü üzäge başlığı, professor Märtxan Dündarnıñ fikerlären citkergän idek.
Bügenge yazmada bez Tatar ênsiklopediyası institutı mödire professor doktor İskändär Ğiläcev belän äñgämä täqdim itäbez.
Äñgämäne videoyazmadan qarıy alasız yäki TAWIŞ uynatqıçınnan tıñlıy alasız.
Änkarada ütkärelgän 4nçe Xalıqara Ğabdräşit İbrahim simpoziumında Tatarstannan qatnaşqan Tatar ênsiklopediyası institutı mödire professor doktor İskändär Ğiläcev belän söyläşüebezneñ däwamın häm Şihabetdin Märcäni isemendäge tarix institutı professorı, doktor İldus Zahidullin belän şuşı fänni cıyında yasağan çığışı turında mäğlümat birep uzğan äñgämäne kiläse yazmada täqdim itärbez.
