Dilmaç: “TRT Tatar - tatarlar öçen al’ternativ çığanaq”

Tatarstan İlbaşı Röstäm Miñnexanov Törkiyädä

Törkiyä Premyer-ministrı Binali Yıldırımnıñ Rusiyä Federaśiyäse säfäre qısalarında Tatarstanda oçraşular ütkärüennän soñ 15nçe dekabr’ könne Tatarstan İlbaşı Röstäm Miñnexanov citäkçelegendäge wäkillek Törkiyä başqalası Änkarada bulıp kitte.

Törkiyäneñ Ğäbzä oyışqan sänäğät töbäge, Törek hawa yulları, qayber xolding häm tözeleş şirkäte wäkilläre belän oçraşqan Röstäm Miñnexanov İlbaşı Räcäp Tayyip Ärdoğan belän dä küreşep söyläşte.

İlbaşı qolliyäsendä matbuğatqa yabıq kileş ütkärelgän oçraşu yaqınça 40 minut däwam itte.

Oçraşuda Törkiyä iqtisad ministrı Nihat Zäybäkci dä qatnaştı.

Annan soñ DEİK Tışqı iqtisadi mönäsäbätlär oyışması oyıştırğan Törkiyä-Tatarstan êş forumında çığış yasawçı Miñnexanov, törek êşmäkärläreneñ Tatarstanda yaqınça 2 milliard dollar külämendä kapital saluın belderep: “Tatarstan iqtisadı törek investorlarınıñ aqça kertüe näticäsendä üsä”, - dip äytte.

Röstäm Miñnexanov Törkiyä şirkätläreneñ Tatarstanda êşläp çığarğan êşlänmälärneñ barı tik Rusiyädä häm Tatarstanda ğına tügel, başqa illärdä dä soraw-taläp kürüen assızıqladı.

Vizadan azat itelüe mäs’äläsendä Rusiyä Federaśiyäseneñ Änkara ilçelege belän urtaq êşçänlek alıp baruların añlatuçı Miñnexanov qabatlawlı viza ğamäleneñ al’ternativ ısul bula alaçağın da äytep uzdı.

Hawa transportınıñ möhimlegenä tuqtalıp uzuçı Tatarstan İlbaşı Miñnexanov ayıruça, Törek hawa yulları räsmiläre belän oçraşıp, Törkiyä belän ike yaqlı säfärlärneñ atnanıñ här könendä yasaluı teläklären belderde.

Tatarstan Cömhüriyäte Kapital salunı üsterü agentlığı başlığı Taliya Miñnullina da, Tatarstanğa salınğan çit il investiśiyäläre yağınnan Törkiyäneñ berençe urında toruına iğtibarnı yünältep: "Kapital salu mäs’äläsendä törek investorları bik tiz qarar qabul itä häm bu qararlar şunda uq tormışqa aşırıla. Yäğni qarar qabul itü êtabı belän citeşterügä küçü êtabı arasındağı waqıt bik qısqa. Töreklär bu mäs’älädä bik osta”, - dip äytte.

Miñnullina investiśiyälär ölkäsendä bigräk tä sälamätlek saqlaw tarmağına östenlek birülären, nefteximiya, ênergetika häm cihazlar êşläp çığaru sektorlarında kapital salunıñ däwam iteläçägen assızıqlap äytep uzdı.

Premyer-ministr Binali Yıldırım Törkiyä säfärenä kilgän Tatarstan İlbaşı Röstäm Miñnexanov belän başqala Änkarada oçraştı.

Çankaya sarayında ütkärelgän oçraşu 40 minut däwam itte.

Soñınnan Tatarstan qunaqların Törkiyä Tışqı eşlär ministrı Mäwlüt Çavuşoğlu qabul itte.

Ministr Çavuşoğlu Miñnexanov belän ütkärgän söyläşü waqıtında Törkiyäneñ Tatarstandağı xäzerge investiśiyälärenä tuqtalıp uzdı.

İqtisadi xezmättäşlekneñ tağın da arttırıluı öçen bu ölkädäge böten kirtälärneñ beterelüeneñ möhimlegenä basım yasaldı.

Oçraşu waqıtında mäğarif, mädäniyät häm başqa tarmaqlardağı xäzerge waqıttağı xezmättäşlekneñ üsterelüenä qağılışlı mäs’älälär dä bäyälände.

Turxan Dilmaç: ““TRT Tatar” tatarlar öçen al’ternativ çığanaq bula ala”

Uzğan yazmalarıbızda Törkiyä Cömhüriyäteneñ Tatarstan başqalası Qazandağı baş konsulı Turxan Dilmaç belän äñgämä täqdim itä başlağan idek.

Monnan aldağı yazmalarıbızda Tatarstanğa kilgänçe qayda wazıyfalar başqaruı häm tatar telen niçek öyränüen añlatqan Turxan äfände Törkiyä belän Tatarstan bağlanışlarınıñ bügenge torışına bäyä birep uzdı, Tatarstannıñ Törkiyä belän Rusiyä arasındağı mönäsäbätlärdä nindi rol’ uynawı turındağı fikerläre belän urtaqlaşqan ide.

Turxan Dilmaç belän söyläşüebezne däwam itterep, Qazanda häm ğomumän Tatarstanda yäşäwçe töreklär häm törek oyışmaları turında mäğlümat birep uzuın soradıq.

Törkiyäneñ Qazandağı baş konsulı belän äñgämä waqıtında mäğarif mäs’äläsenä dä tuqtalıp uzıp: “Törkiyädä belem alırğa teläwçelär qaysı yullardan uzarğa tiyeş?” dip soraw yünälttek.

Qazandağı Törkiyä konsullığı üz räsmi êşlärennän tış mädäniyät häm sänğät kebek tarmaqlarda da êşçänlek başqara. Şuşı çaralarnı añlatuçı Turxan äfändedän “Törkiyä awazı” radiosı häm “TRT Tatar” internet säxifäse turındağı fikerläre belän dä urtaqlaşuın soradıq.

Törkiyäneñ Tatarstan başqalası Qazandağı baş konsulı Turxan Dilmaç belän äñgämäne tawış uynatqıçınnan tıñlıy alasız yäisä videoyazmasın qarıy alasız.

Fotosürätlär “tatarstan.ru” säxifäsennän alındı.