Törek matbuğatına küzätü 27.12.2024
27nçe dekabr' könne çıqqan qayber törek gazetlarına küzätü

“Hürriyet” gazetı “Terrorçı oyışmanıñ qoral taşlawdan başqa yulı yuq” dip yaza
Törkiyä milli saqlanu ministrlığı çığanaqları Süriyäneñ yaña idaräse belän saqlanu häm iminlek mäydannarında xezmättäşlek häm terrorçılıqqa qarşı köräş koordinaśiyäse turında belderde. Alar terrorçı oyışma “PKK/YPG”neñ qoral taşlawdan başqa yulı bulmawın assızıqlap: “Yä qoral taşlayaçaqlar, yä yuqqa çığaçaqlar” dip citkerde.
“Habertürk” gazetı Rusiyädän Törkiyä belän bäyle belderü xaqında yaza.
Rusiyä tışqı êşlär ministrı Sergey Lavrov Törkiyäneñ Süriyä çigendäge qurqınıçsızlıq borçuların añlawların äytep bolay dide: “Törkiyäneñ iminlek mänfäğat’läre barı Süriyäneñ suverenlığı, cir bötenlege, berdämlege saqlanaçaq räweştä täêmin itelergä tiyeş. Törkiyä idaräse poziśiyäseneñ şul yünäleştä buluın kürsätä häm monı yaqlıy”.
“Star” gazetı Törkiyäneñ hawa küpere wazıyfasın başqaruı turında xäbär itä.
Törkiyä Süriyädäge yaña çorda Dimäşq’qa häm başqa şähärlärgä cibäreläçäk yärdämnär öçen hawa küpere wazıyfasın başqaruın däwam itä. Äle küptän tügel Bötendön’ya sälamätlek saqlaw oyışması 50 tonna mediśina tovarların Törkiyägä kiterde. Alar İstanbuldan Süriyägä cibäreläçäk.
“Yeni Şafak” gazetı “Migraśiya häm keşe xoquqları üzäge tözelä” dip citkerä.
Törkiyä möhacirlärneñ xoquqların saqlaw häm kritik mäs’älälärdä säyäsät alıp baru maqsatınnan “Migraśiya häm keşe xoquqları tikşerenü üzäge” isemle yaña oyışma tözi.
“Sabah” basması Franśiyä matbuğatınıñ törek saqlanu sänäğaten maqtawı turında yaza
Franśiyä xäbär säxifäse “Secret Defense” Törkiyä xärbi-hawa köçläre öçen yasalğan “Gökçe” häm “Gözde” yaña buın nişanğa alu cihazların maqtap yazdı. Älege qoral sistemaları belän Änkaranıñ geosäyäsi yoğıntısın arttıracağı belderelde.