Törek matbuğatına küzätü 10.12.2024

“Hürriyet” gazetı Ärdoğannıñ Süriyäneñ cir bötenlege belän bäyle süzlärenä urın birä.  

Törkiyä ilbaşı Räcäp Tayyip Ärdoğan kabinet cıyılışınnan soñ yasağan belderüendä bolay dide: “Törkiyä başqa ilneñ cirläre häm suverenlığına qul suzarğa cıyınmıy. Çik ar’yağı xäräkätlärebezneñ töp maqsatı - watanıbız häm watandaşlarıbıznı terrorçı höcümnärennän saqlaw. “PKK” häm anıñ Süriyädäge däwamçıları da, DEAŞ ta bezneñ äñgämädäşlär tügel, doşmanıbız”.

“Star” gazetı Fidannıñ Süriyä belän bäyle çaqıruın citkerä.

Törkiyä tışqı êşlär ministrı Xaqan Fidan Änkarada 15nçe İlçeleklär konferenśiyäsendä yasağan çığışında Süriyädäge yaña çor turında süz quzğattı. “Xalıqara aktyerlar Süriyä xalqına qul suzarğa tiyeş. Törkiyä monnan soñ da Süriyäneñ cir bötenlege, säyäsi berdämlege, kiläçäge, iminlek häm totrıqlılıq täêmin itü öçen qulınnan kilgänne êşlärgä tırışaçaq”,-dide ul.

“Yenişafak” gazetı “Törkiyädäge süriyälelär illärenä kire qayta” dip yaza.  

Watandaşlar suğışı waqıtında Törkiyägä sıyınğan süriyälelär 61 yıllıq Baas partiyäse rejimı tüntärelgännän soñ illärenä qayta. Alar Xatay töbägendäge çik buyı qapqasında ozın çiratqa tezelde.

 “Vatan” gazetı transport tarmağındağı yañalıq turında citkerä.

Törkiyä transport häm asqorma ministrı Abdulqadıyr Uraloğlu İstanbul aêroportında 17nçe aprel’dä 3 oçış yulında ber ük waqıtta töşep utıru-kütärelep kitüne başlayaçaqların belderde. “Bu sistema Awrupada täwge tapqır bulaçaq”,-dide ul.

“Sabah” gazetı “Dön’yanıñ iñ matur urınnarı isemlegendä Törkiyäneñ 2 ob’yektı bar” dip yaza.

“Time” jurnalı säyäxätçelär öçen dön’yadağı iñ matur urınnar isemlegen äzerläde. Anda Törkiyä ike tapqır qabatlana - İstanbuldağı Zäyräk Çinili xamamı häm Diyarbaqır êkspressı belän.