Törek matbuğatına küzätü 2.12.2024

“Yeni Şafak” gazetı “Fidan Blinken belän Süriyä turında söyläşte” dip yaza. Törkiyä tışqı êşlär ministrı Xaqan Fidan AQŞ däwlät särqatibe Êntoni Blinken belän Yaqın Könçığıştağı waqıyğalar turında telefonnan söyläşte. Fidan Süriyädä tınıçlıq öçen rejim häm oppoziśiyäneñ säyäsi barışnı tämamlarğa kiräklegen belderep, “Törkiyä häm Süriyädäge tınıç xalıqqa qarata terror ğamällärenä röxsät birelmäyäçäk” dide.

“Haber Türk” gazetı ministr Şimşäkneñ süzläre belän “Törkiyä saqlanu sänäğatendä global’ aktyer buldı” dip citkerä. Qazna häm finans ministrı Mäxmät Şimşäk Törkiyäneñ saqlanu sänäğatendä ireşkän uñışlarına tuqtalıp, cirle êşlänmälär citeşterü külämeneñ  80%qa citüen äytte. “Törkiyä saqlanu sänäğatendä global’ aktyer buldı”,- dide ministr.

“Hürriyet” gazetı milli mäğarif ministrınıñ mäktäpkäçä yäş’täge balalarnı uqıtu-öyrätü turındağı yazmasın uquçıları belän urtaqlaşa. Milli mäğarif ministrı Yosıf Täkin Törkiyädä mäktäpkäçä yäş’tägelärgä belem birü däräcäseneñ 2023-2024 nçe uqu yılında 5 yäş’tägelär arasında 95,44%qa citüen belderde. Täkin äytüençä, OECD xisabına qarağanda Törkiyä mäktäpkäçä yäş’täge balalarnı uqıtuda barlıq illär arasında iñ zur üseşkä ireşkän il buldı.

“Star” gazetı “Törek ğalimnäre mine uqu sistemasın êşlädelär” dip xäbär itä. Älazığ Fırat universitetınıñ texnologiya fakul’tetınnan 6 uqıtuçı häm 6 student Törkiyädä berençelärdän bulıp baş miyen uqu sistemasın êşlädelär. Söyläşä almağan, paraliç bulğanğa reakśiya kürsätä almağan keşelär öçen ömet bulaçaq sistema yärdämendä awıru keşelär miyenä birgän signalnı alıp yasalma intellekt belän uy-töşençäläre tärcemä itelä.

“Vatan” gazetı “THYnıñ Sidneyğa oçışları başlandı” isemle xäbärendä citkergänçä, 6 qıytğada 351 punktqa oçışlar başqarğan “Törek hawa yulları”(THY) aviakompaniyäse yaña oçış çeltärenä Avstraliya qıytğasındağı Sidneynı da östäde. Sidney aviakompaniya yünäleşläre arasında iñ ozın oçış marşrutı buldı.