Törek matbuğatına küzätü 12.11.2024

“Hürriyet” gazetı ilbaşı Ärdoğannıñ êmbargo çaqıruın uquçıları belän urtaqlaşa. Törkiyä ilbaşı Räcäp Tayyip Ärdoğan kiçä Riyadta uzğan Ğaräp Ligasınıñ çirattan tış urtaq sammit cıyılışında İzrailneñ keşelekkä qarşı cinayät’ qıluına basım yasadı. “Alarnıñ maqsatı – Ğazzädä urnaşu. İslam illäre bularaq bez İzrailgä qarşı adımnar yasarğa tiyeş. Barınnan da bigräk İzrailgä qoral êmbargosı kertü häm säwdäne tuqtatu bik möhim”,- dide Törkiyä ilbaşı Ärdoğan.

“Yeni Şafak” gazetı “Dön’yada iñ tiz üsüçe saqlanu sänäğate” isemle yazmasında citkergänçä, Franśiya saqlanu ministrlığı Törkiyä saqlanu sänäğate turında kiñ qırlı xisap bastırdı. “Törkiyä dron’ industriyäse - dön’yada iñ tiz üsüçe texnologik êkosistemalarınıñ berse” ğıybaräse urın alğan xisapta Törkiyäneñ  pilotsız hawa apparatların häm qorallı pilotsız hawa apparatların satıp  alğan Afrika illäre karta belän kürsätelde.

“Vatan” gazetı “TUSAŞ” häm “BAYKAR” dön’yanıñ iñ zur 50 aviaśiya şirkäte arasında” dip yaza. “Counterpoint Market Intelligence” tarafından ütkärelgän bäyäläwdä Törkiyäneñ milli hawa transportı citeşterüçeläre Törek aviaśiya häm ğaläm sänäğate “TUSAŞ” belän “BAYKAR” döny’yadağı iñ êre 50 aviaśiya şirkäte arasına kerde.

“Star” gazetı “TCG Anadolu”dan täwge adım” isemle xäbärendä yazğança, Törkiyä milli saqlanu ministrlığı “TCG Anadolu” küp maqsatlı amfibiya köymäse belän “TCG Där’ya” diñgezdä yağulıq belän täêmin itüçe köymäneñ berençe tapqır diñgezdä yağulıq häm qatı yök belän täêmin itü başqaruların citkerde.

“Sabah” gazetı “Törkiyädän Serbiyägä êksportta rekord” isemle xäbärendä citkergänçä, Törkiyä bıyılnıñ 10 ayında Serbiyägä 1 milliard 471 million 100 meñ dollar külämendä êksport başqardı, bu isä xäzergä çaqlı iñ yuğarı ğıynwar-oktyabr’ ayları kürsätkeçe.