Törek matbuğatına küzätü 28.10.2024

“Haber Türk” gazetı Törkiyäneñ terrorçılıqqa qarşı köräşe turında citkerä

Törkiyä ilbaşı apparatınıñ baş kiñäşçese Mäxmät Uçum älege mäs’älädä bolay dip belderde: “Yaqın Könçığış regionınıñ kiläçäge Törkiyäneñ milli iminlege häm cir bötenlegenä yanawçı bernindi prośessqa, variantqa häm strukturağa açıq bula almıy. Törkiyä moña yul quymas”.

“Vatan” gazetı Ömär Çälikneñ “TUSAŞ” belän bäyle belderüenä urın birä.

AK partiyä süzçese Ömär Çälik Törek aviaśiya häm ğaläm sänäğate şirkäte “TUSAŞ”qa yasalğan terrorçı höcümeneñ maqsatınıñ Törkiyäneñ iğ’tibarın töbäktäge problemalardan çitkä yünältü buluın belderde. “Bez, Törkiyädä êçke frontıbıznı köçäytkän şikelle, terrorçılıqqa häm tirä-yünebezdäge suğış çeltärlärenä qarşı da köräşä beläbez”,-dide ul.  

“Star” gazetı Törki däwlätlär oyışmasında xezmättäşlek adımnarı turında yaza.

Törki däwlätlär oyışmasına äğ’za illär arasında sänäğat’, fän häm texnologiyä tarmağında xezmättäşlekne arttıraçaq 12 êş törkeme qorıldı. Törkiyä sänäğat’ häm texnologiyä ministrı Mäxmät Fatix Kacır “Fän, texnologiyä, innovaśion häm sänäğat’ tarmaqlarında konkret proyektlarnı tiz arada tormışqa aşıraçaqbız”,-dide.  

“Yeni Şafak” gazetı milli xärbi oçqıç “KAAN”nıñ kiber iminlek qalqanı turında citkerä.

Törek saqlanu sänäğateneñ aldınğı şirkätlärennän “STM” kiber iminlek alanında alıp baruçı êşçänlekläre belän iğ’tibarnı cälep itä. Ul milli xärbi oçqıç “KAAN”nı cirle kiber iminlek sisteması belän cihazlandıra.  

“Sabah” gazetı “Cir häm kük qızıllı-aqlı bulaçaq” dip xäbär itä.

29nçı oktyabr’ Cömhüriyät bäyrämendä, tantanalar qısasında, başqala Änkarada parad uzdırılaçaq. Törkiyä xärbi- diñgez köçläre 29 korab belän 29 portqa kiläçäk. İstanbulda - “SOLOTÜRK”, İzmirdä isä “Törek yoldızları” törkemnäreneñ oçışları häm başqa bik küp çara oyıştırılaçaq.