Törek matbuğatına küzätü 14.08.2024

“Hürriyet” gazetı yazğança Törkiyä tışqı êşlär ministrlığı tübändäge belderüne yasadı: “Aralarında ministrlar da bulğan yözlärçä radikal’ İzrailleneñ Äl-Aqsa mäçetenä poliśiya belän kerüe, Qodüs-Yerusalimneñ tarixi statusın bozuçı, töbägebezdäge kiyerenkelekne tağın da üsteräçäk qotırtu bulıp tora.”

“Haber Türk” basması citkergänçä Törkiyä tışqı êşlär ministrı Xaqan Fidan, Qatar häm Misır tışqı êşlär ministrları belän ütkärgän telefon söyläşüendä İzraille ministrlarnıñ Fälästin cirlären yawlap alğan fanatik yähüdilär belän izge “Äl-Aqsa” mäçeten basuın häm Ğazzädäge soñğı wazğıyät’ne quzğattı.

“Star” gazetı xäbärenä kürä Törkiyäneñ İzrailneñ “Timer gömbäz” proyektına köndäş bula alaçaq qatlamlı hawa saqlanu sistemasın yasawnı maqsat itüçe programma başlatuın belderüçe dön’ya matbuğatı “Törkiyä İzrailneñ “Timer gömbäze”nä qarşı “Qorıç gömbäz” belän qarşı toraçaq” dip yazdı.

“Sabah” basması beldergänçä Törkiyä ilbaşı urınbasarı Cäwdät Yılmaz xalıqara şirkätlärneñ Törkiyägä investiśiya kertü qararın açıqlawların assızıqlap tübändägeçä däwam itte: “Dön’yanıñ aldınğı investiśiya şirkätläreneñ yuğarı däräcäle citäkçelären Xörmätle ilbaşıbız räislegendä 28 sentäbr’ könne oyıştırılaçaq İnvestiśiya kiñäşmä şurası cıyılışıbızğa çaqırdıq.”

“Yeni Şafak” gazetı yazğança çit illärdän Törkiyägä ağımdağı yılnıñ berençe 6 ayında 4 milliard 700 million dollarlık investiśiya kertelde. Niderland, Amerika Quşma Ştatları, Germaniya, İrlandiya, Norvegiya häm Böyekbritaniya Törkiyägä berençe 6 ayda iñ küp investiśiya kapitalı kertkän illär buldı.