Törek matbuğatına küzätü 31.07.2024
Qayber törek basmalarına küzätü
“Hürriyet” gazetı yazğança Törkiyä ilbaşı Räcäp Tayyip Ärdoğan kiçä Ak partiyaneñ kiñäytelgän vilayät’ başlıqları cıyılışında çığış yasap: “Ğazzädä yaqınça 300 kön buyı wäxşi genośid başqarıla. İzrail 40 meñ fälästinle qardäşebezne bombağa totıp wäxşilärçä şähit itte. Gitlernı da uzıp kittelär,” – dide.
“Star” basması beldergänçä Törkiyä-Ärmänstan maxsus wäkilläre Kılıç häm Rubinyan çik buyında küreşep söyläşte. İke ilneñ urtaq çigendä urnaşqan Alican-Margara çik buyı qapqasında çınğa aşqan söyläşüdä maxsus wäkillär monnan aldağı cıyılışlarda kileşü täêmin itelgän xosuslarnı rasladı.
“Sabah” gazetı xäbärenä kürä Törkiyäneñ berençe Neft’ çığaru, saqlaw häm töyäw öçen yözmä caylanması Singapurdan Törkiyägä taba yulğa çıqtı. Ênergetika häm tabiğıy çığanaqlar ministrı Alparslan Bayraktar tübändägeçä citkerde: “Yözmä sänägät’ qorılması bulğan bu gigant diñgez bazası yärdämendä här kön 5 million öyneñ ixtıyacın qanäğat’länderäçäk qadär tabiğıy gaz citeşteräçäkbez.”
“Vatan” basması citkergänçä Aydındağı Afrodizias borınğı qalasında başqarılğan qazularda Zevs başı tabıldı. Mädäniyät häm turizm ministrı Mäxmät Nuri Ärsoy bolay dip belderde: “Afrodiziasta tiñe bulmağan açış bu. Küpme ğasırdan soñ tabılğan märmär baş grek mifologiyasendä iñ köçle häm möhim täñre bulğan Zevsnıñ kürkämlelegen kürsätä.”
“Haber Türk” gazetı yazğança Parij 2024 Olimpiada uyınnarında Yosıf Dikäç häm Şävval İlayda Tarhannan toruçı Törkiyäneñ milli taqımı finalda Serbiya komandasın 16-14 isäbe belän ciñep, kömeş medal’ yawladı.
