Törek matbuğatına küzätü 18.09.2023

“Hürriyet” gazetı Ärdoğannıñ “Qor’ängä qarata höcümnärne qabul itmibez” digän belderüen alğı planğa çığara.

Türkiyä ilbaşı Räcäp Tayyip Ärdoğan AQŞnıñ N’yu-York şähärendä Törek-Amerika milli idarä komitetı oyıştırğan kiçke aş mäclesendä çığış yasadı.  Ul anda: “Dön’ya külämendäge 2 milliard möselmannıñ izgelärenä höcüm itüne süz irege sıltawı belän legal’läşterüne berqayçan da qabul itmäyäçäkbez,”-dip belderde.

“Sabah” gazetı “Ärdoğannıñ İlon Maskka täq’dime dön’ya kön üzägendä” dip yaza.

İlbaşı Räcäp Tayyip Ärdoğan AQŞnıñ N’yu-York şähärendä “Törek yortı”nda “Tesla”nıñ xucası İlon Mask belän söyläşüdä şirkätneñ 7nçe êşxanäsen Türkiyädä tözergä çaqırdı. Xalıqara media bu täq’dimne başça itep quydı.

“Vatan” gazetı isä Ärdoğannıñ İlon Masknı “Texnofest”qa çaqıruın citkerä.

İlbaşı Ärdoğan ğaläm transport şirkäte “SpaceX”nıñ citäkçese İlon Mask belän oçraşuda Türkiyädäge texnologik üseş xaqında süz quzğattı. Ul Masknı 2023nçe yılnıñ 27nçe sentyabrennän 1nçe oktyabr’gä qadär İzmirdä uzaçaq ğaläm, aviaśiya häm texnologiyä festivale “Texnofest”qa çaqırdı.

“Yeni Şafak” gazetı Türkiyäneñ saqlanu sänäğatendäge üseşe xaqında yaza.

Türkiyä transport häm asqorma ministrı Abdulkadir Uraloğlu Törek aviaśiya häm ğaläm sänäğate şirkäte TUSAŞnıñ “Gökbäy”, “Atak” boralaqları, “Hürjet” oçqıçı, “Hürkuş” çiñel oçqıçı, “ANKA” keşesez hawa apparatı häm “KAAN” milli xärbi oçqıçın citeşterü ob’yektlarında buldı. Ul Türkiyäneñ saqlanu sänäğate tarmağında täêmin itüçe däwlätkä äwerelüen belderde.

“Star” gazetı AQŞnıñ Türkiyä belän säwdä forsatları xaqındağı belderüenä urın birä.

AQŞ säwdä ministrınıñ global’ bazar öçen cawaplı urınbasarı Arun Venkataraman Amerika belän Türkiyä arasındağı säwdäneñ ikelätä artıp üsüe öçen citdi forsat kürülären belderde häm 100 milliard dollarlıq maqsatqa ireşüneñ mömkin buluın äytte.