Törek matbuğatına küzätü 1.07.2022
1 nçe iyül' könne basılıp çıqqan qayber törek gazetlarına küzätü
“Yeni Şafak” gazetı Törkiyä ilbaşınıñ “Bez qul quğan memorandum - tarixi ciñü” digän süzlären uquçıları belän urtaqlaşa.
Törkiyä ilbaşı Räcäp Tayyip Ärdoğan kiçä İspaniya başqalası Madridta NATO liderlar sammitınnan soñ oyıştırılğan matbuğat oçraşuında “Şveśiya, Törkiyä, Finlyandiya qul quyğan öç yaqlı memorandum – awır söyläşü barışınnan soñ Törkiyä öçen zur diplomatik ciñü” dip äytte.
“Hürriyet” basması AQŞ ilbaşı Baydennıñ “Bez F-16 oçqıçların Törkiyägä satırğa tiyeş” digän süzlären alğı planğa çığara. Amerika Quşma Ştatları ilbaşı Djo Bayden NATO liderlar sammitınnan soñ uzğan bäyäläw cıyılışında “ Bez F-16 oçqıçların Törkiyägä satırğa tiyeş. Satmaw bezneñ faydağa tügel. Kongress raslarğa tiyeş, monı êşli alabız” dide.
“Sabah” gazetı yazğança, İspaniya prem’yer-ministrı Pedro Sançes Madridta uzğan NATO sammitında “konstruktiv totış” kürsätkän öçen Törkiyägä räxmät äytte.
“Törkiyä qurqınıçsızlıq häm aradaşçılıqta möhim partnyer. Bügen ilbaşı Ärdoğan belän oçraştım. Rusiyäneñ Ukrainağa qarata agressiyäsen tuqtatu häm dialogka öndäw yünäleşendäge diplomatik tırışılıqları öçen aña räxmät äyttem”dide Sançes.
“Haber Türk” basması bıyılnıñ may ayında Törkiyäneñ êksportınıñ 15,3%qa artıp, 18 milliard 984 million dollarğa citüe turında yaza. Êksportta berençe urında Germaniya tora. Älege ilgä 1 milliard 492 million dollar külamendä êksport başqarıldı.
”Star” gazetı citkergänçä, Aljirda uzuçı 19 nçı Urta diñgez uyınnarınıñ 5 nçe könendä Törkiyä dzyudoçısı Vedat Albayrak 81 kilogramm awırlıq finalında İtaliyädän köndäşe Kenni Komi Bedelnı ciñep altın medal’ yawladı.
