Törek matbuğatına küzätü 23.06.2022

Qayber törek basmalarına küzätü

1847262
Törek matbuğatına küzätü 23.06.2022

“Star” gazetı yazğança Törkiyä ilbaşı Räcäp Tayyip Ärdoğan Törkiyägä kilgän Soğud Ğaräbstanı täxet warisı, prinŝ Möxämmäd bin Sälman belän küreşte. Söyläşüdän soñ açıqlanğan urtaq beldergedä ike il arasındağı ike yaqlı mönäsäbätlärdä yaña xezmättäşlek çorınıñ başlanuına qarağan urtaq täwäkkällek assızıqlandı.

“Xörriyät” basması Êlemtä başlığı Faxrettin Altunnıñ süzlären uquçıları belän urtaqlaşa: “Şveŝiyaneñ NATOğa kerüenä uñay qaraw bez Şveŝiya xalqın höcüm bulğan oçraqta yaqlarğa tiyeş digänne añlata. Ägär dä bez Şveŝiya öçen mondıy cawaplılıqnı üz östebezgä alırğa tiyeş ikän, Şveŝiyada cıyılğan aqçalar belän Törkiyä watandaşlarına qarşı terror höcümnäreneñ oyıştırılmayaçağına, Süriyädä yäisä Ğıyraqtağı terror oyalarınnan Şveŝiya qorallarınıñ çıqmayaçağına nıqlap ışanuıbız kiräk.”

“Yeni Şafak” gazetı beldergänçä aşlıq töyälgän köymälärneñ Ukrainadan çığuı öçen alıp barıluçı “qızıl liniya diplomatiyase” qısalarında Törkiyä häm Rusiyä xärbi wäkillekläre Mäskäwdä oçraştı. Söyläşü berençe tögäl näticä birde häm Törkiyäneñ qorı yök köymäse Ukrainadan yulğa çıqtı.

“Watan” basması xäbärenä kürä Törkiyäneñ berençe Su astı köymäsen sınau asqorıması tormışqa aşırıldı. Test platforması bulğan DATA su astında raketa häm torpedolarnı model’läşterä häm oçırtıp, sınıy. Sänägät’ häm texnologiya ministrı Mostafa Varank: “DATA möhim xärbi kiräk-yaraqlarnı qamilläşterü barışların tizländeräçäk,” – dide.

“Sabah” gazetı citkergänçä Törkiyäneñ Awıl häm urman xucalığı ministrı yärdämçese Äbubäker Gizligider İstanbulda oyıştırılğan 8nçe Törek-ğaräp Azıq-tölek häm texnologiyaläre yärminkäsendä tübändägeçä belderde: “Awıl xucalığı produkŝiyasendä Törkiyä Awrupada berençe urında, dön’yada isä berençe unlıqta.”



Bäyläneşle xäbärlär