Törek matbuğatına küzätü 11.01.2022
11nçe ğıynvar könne çıqqan qayber törek gazetların küzätü
“Habertürk” gazetı Törkiyäneñ Qazaqstan belän bäyle belderüen alğı planğa çıara.
AK partiyä wäkile Ömär Çälik firqa cıyılışında bolay dip belderde: “Andağı xälne yaqınnan küzätep barabız. Telägebez – Qazaqstannıñ tınıçlıq, totrıqlılıq häm suverenlığın saqlayaçaq räweştä bu awır könnärne ütkärep cibärüe. Şartlar nindi genä bulsa da, Törkiyä härwaqıt Qazaqstan yanında bulaçaq”.
“Vatan” gazetı Törkiyä belän AQŞ arasındağı kritik söyläşü xaqında citkerä.
İlbaşı idaräse süzçese İbrahim Kalın AQŞ milli iminlek kiñäşçese Djeyk Sallivan belän telefonnan söyläşte. Anda säyäsi häm iq’tisadi mönäsäbätlär, saqlanu xezmättäşlegen üsterü mäs’äläläre, global’ häm regional’ temalar kütärelde.
“Star” gazetı Gruziyäneñ Törkiyädän darular satıp alırğa uylawın citkerä.
Gruziyä xökümäte räise İrakli Garibaşvili ileneñ farmaśevtika bazarın Törkiyädän kitereläçäk preparatlarğa açarğa planlaştıruların belderde.
“Yeni Şafak” gazetı 30 minutta qorıla torğan küçmä xastaxanä turında yaza.
Törkiyäneñ Niğdä töbägendäge xärbi êşxanädä NATO sıyfat standartlarına turı kilüçe küçmä qır xastaxanäse yasaldı. Ul operaśiyä bülmäse, aşığıç yärdäm, reanimaśiya, radiologiya, laboratoriya, daruxanä, teş däwalaw, yuınu urını şikelle 13 konteynerdan tora. Xastaxanä qır urtasında yaqınça 30 minutta qorıla.
“Hürriyet” gazetı “Nemeślarnıñ küze Urta diñgezdä” dip yaza
Awrupanıñ iñ zur yal bron’laştıru portallarınnan berse HolidayCheck mäğ’lümatlarına qarağanda, Germaniyädän här 5 keşeneñ berse yal öçen Törkiyäne saylıy. Aprel’ häm may öçen aldan alıp quyılğan yullamalarnıñ 18%ı – Törkiyäneñ Urta diñgez yarlarına.
