Törek matbuğatına küzätü 21.10.2021
21 nçe oktyabr' könne basılıp çıqqan qayber törek gazetlarına küzätü
”Vatan” gazetı Törkiyä ilbaşı Ärdoğannıň “Nigeriyä belän xezmättäşlegebezne nığıtabız” digän süzlären uquçıları belän urtaqlaşa. İlbaşı Räcäp Tayyiip Ärdoğan Nigeriya ilbaşı Möxämmäd Buxari belän ütkärgän matbuğat oçraşuında “Törkiyä - Nigeriya mönäsäbätlären törle yaqlap küzdän kiçerdek. Nigeriya belän xärbi saqlanu häm qurqınıçsızlıq ölkälärendä xezmättäşlegebezne nığıtabız” dide.
“Yeni Şafak” gazetı Törek Qorallı Köçläre häm milli küzläw oyışmasınıň Ğıyraqnıň tön’yağına oyıştırğan urtaq operaśiyädä “PKK” terror oyışmasınıň güyä xatın - qız atamanı Taybet Bilenneň üterelüe turında yaza. Terrorçı Maxmur lagerına barğanda üterelgän.
”Sabah” gazetı Fuat Oktaynıň inflyaśiya turındağı süzlären citkerä. Törkiyä ilbaşı urınbasarı Fuat Oktay “Bez aqça häm finans säyäsätlärenä täq’dimgä yünälgän struktur säyäsätlärebez häm näticälelek artışı belän yärdäm itep inflyaśiyäne ber sanlı kürsätkeçkä töşerü öçen tırışabız” dide.
“Hürriyet” gazetı xäbär itkänçä, Törkiyä säwdä ministrı Mäxmät Muş Törkiyäneñ dönya êksportındağı öleşeneñ cömhüriyät tarixında täwge tapqır 1%tan artıp kitüen belderde.
“Star” gazetı “Törkiyä iskitkeç il” isemle yazmasında Antaliyada oçraşqan 3 rusiyäle häm 1 ukrainalı 4 dusnıň Likiya yulın 25 köndä uzaçaqları turında yaza. Törkiyägä berençe tapqır kilgän älege tabiğat’ yaratuçılar Likiya yulınıň tarixi häm tabiği maturlıqqa iyä buluın belderde. Mixail Çernyavskiy “Biredä tarix, diňgez, tabiğat’ bik matur. Törkiyä - iskitkeç il. Keşelär êçkersez, sezne bik cılı qarşı alalar. Alar taw başında da sezne sıylarğa tırışalar” dip üz xis - toyğıları belän urtaqlaştı.
