Törek matbuğatına küzätü 16.09.2021

“Yeni Şafak” gazetı “2023nçe yıl – yañadan tuu simvolı” dip yaza.

Kiçä uzğan “6nçı Anadolu media büläkläre” programmasında çığış yasağan ilbaşı Räcäp Tayyip Ärdoğan 2023nçe yılnıñ Törkiyäneñ qabat tuuınıñ simvolı buluın söyläde.

“Hürriyet” gazetı Awrupa Berlege komissiyäse räiseneñ Törkiyä turındağı belderüe xaqında citkerä. 

Ursula fon der Leyen kiçä yasağan tradiśion “Berlekneñ xäle” çığışında “Törkiyä belän mönäsäbätlärebezneñ törle ölkälärendä êşläwne däwam itäbez,”-dide.

“Star” gazetınıñ “Kürşe belän imzalar quyıldı. Törkiyägä räxmät” iseme astındağı xäbärendä yustiśiyä ministrı Abdulxamit Gülneñ Gruziyägä säfäre turında süz bara. Anıñ qısalarında ike däwlätneñ xoquq yaqlaw ölkäsendä xezmättäşlege turındağı kileşü imzalandı. Gruziyäneñ xökümät räise İrakli Garibaşvili ileneñ cir bötenlege häm suverenlığı, Awrupa-Atlantik integraśiyäse mäs’älärendäge yärdäme öçen Törkiyägä räxmät belderde.

“Sabah” gazetı “Ciläk-cimeş häm yäşelçä êksportında Greśiya rekordı” xaqında citkerä.

Törkiyäneñ ciläk-cimeş häm yäşelçä êksportı 14%qa arttı häm kerem 148 million dollardan kübräk buldı. Avgust ayında Greśiya bazarına satu 18 tapqırğa üste. Liviya belän İzrail dä Törkiyädän êksport iñ küp artqan illär rätendä. 

“Haber Türk” gazetı Törkiyädän toraq alğan AQŞlılarnıñ sanınıñ 8 ayda 3,5 tapqır artuın citkerä.

Ğıynvardan avgustqa qadär çit il keşelärenä 30 meñ 849 toraq satıldı. Älege çorda Törkiyädä yort-cirle bulğan Amerika watandaşlarınıñ sanı, uzğan yıl belän çağıştırğanda, 3,5 tapqır artıp 871 keşe täşkil itte.