Törek matbuğatına küzätü 23.08.2021
23nçe avgust könne çıqqan qayber törek gazetlrına küzätü
“Yeni Şafak” gazetı ilbaşı Räcäp Tayyip Ärdoğannıñ Awrupa liderların äfğan tärtipsez migraśiyäse krizisqa äwerelgänçe çara kürergä çaqıruı xaqında yaza.
Törkiyä ilbaşı Awrupa Berlege şurası räise Mişel’ häm Angliyä xökümäte räise Djonson belän telefon aşa söyläşte. Ul Äfğanstan häm İranda kiräkle çaralar kürelmäsä, yaña migraśiya dulqınınıñ qotılğısız buluın belderde.
“Hürriyet” gazetı Törkiyäneñ äfğannar öçen “sıyınu üzäkläre” buldıruı turındağı süzlärne kire qağuın xäbär itä.
Tışqı êşlär ministrlığı Angliya mediasında çıqqan “Äfğanstan möhacirläre öçen Törkiyädä sıyınu möräcäğate üzäge qoru planlaştırıla” digän xäbärlär belän bäyle belderü yasadı. Anda monıñ çınbarlıqqa turı kilmäwe äytelä.
“Star” gazetı Bayraktar TB2 qorallı keşesez hawa apparatınıñ dön’yada iñ yaxşısı buluın citkerä.
Baykar şirkäteneñ texnik mödire Sälçuk Bayraktar Törkiyäneñ dronnar yasawda äydäp baruçı buluın belderde. Ul aviaśiyädä bik alğa kitkän däwlätlärneñ dä üzlärennän qorallı keşesez hawa apparatları satıp aluın äytte.
“Sabah” gazetı Törkiyädä yılnıñ ikençe çiregendä kötelgän rekord üseş turında yaza.
Berençe yartıyıllıqta äyläneş täwge tapqır 1 trillion liradan arttı. Çista tabış 155%qa üste häm 89,5 milliard liradan kübräk täşkil itte. Üseşneñ äydäp baruçı tarmağı bulğan sänäğat’tä isä tabış 5,5 tapqırdan da artığraq.
“Haber Türk” gazetı xatın-qızlar voleybolındağı uñışlar xaqında citkerä.
Törkiyäneñ A törkeme xatın-qızlar cıyılma voleybol komandası Serbiyä, Rumıniyä, Xorvatiya häm Bolgariya bergä oyıştırğan Awrupa çempionatında Şveśiyäne 3kä 0 isäbe belän ciñde. Şulay itep, alar yarıştağı 3nçe matçta da östen çıqtı.
