Dön’ya matbuğatına küzätü 05.08.2021

Ğıyraqnıñ El-Zeman gazetı yazğança, Törkiyä äfğanlılarnıñ öçençe ber däwlätkä urnaştırıluı belän bäyle Amerika proyektın tänqıyt’läde.

Katarnıñ “El-Raya El-Katariye” gazetı Törkiyäneñ 33 şähärdä çıqqan yanğınnarnıñ 167sen sünderä aluı turında citkerä.

Ommannıñ “El-Vatan” gazetı Greśiyädä koronavirus vakśinası yasatudan baş tartqan uqıtuçılarnıñ xezmät xaqlarınıñ kimeteläçäge xaqında yaza.

Franśiyäneñ “Le Monde” gazetı xäbärenä qarağanda, Meksika Amerikanıñ qoral citeşterüçelärenä qarşı täwge tapqır xoquqıy köräş başladı.

Şul uq ilneñ “Le Figaro” gazetı yazğança, AQŞ üz çiklären koronavirus vakśinası yasatqan säyäxätçelärgä açarğa planlaştıra.

“France 24” kanalı citkergänçä, Franśiyä däwläte hawa pıçraqlığı arqasında 10 million yevro külämendä ştrafqa tartıldı.

Nemeś telendäge “Deutsche Welle” basması xäbärendä äytelgänçä, Germaniyäneñ Änkara ilçese Yurgen Şul’ś Awrupa Berlege belän Törkiyä arasındağı strategik xezmättäşlekne arttırırğa teläwlären belderde. “Törkiyä - Awrupa Berlegeneñ teläsä-qaysı xezmättäşe şikelle tügel. Anıñ ayırım urını bar,”-di ul.

deutschlandfunk.de säxifäse Törkiyä, Greśiyä häm İtaliyädä çiktän tış êsselek häm urman yanğınnarınıñ däwam itüe turında yaza.

Spiegel.de säxifäse AQŞnıñ äfğan möhacirläreneñ Törkiyä şikelle 3nçe däwlätlärgä kitä aluı turındağı belderüenä Änkaranıñ rizasızlıq kürsätüen citkerä.

İspaniyäneñ “El País” gazetı “Yanğınnar êsselek belän bergä Könçığış Urta diñgezne “aşap” beterä. Ber belgeçneñ süzlärenä qarağanda, bu – klimat üzgärü waqıtında bez küräçäk ğadäti tormış bulaçaq” dip yaza.

Meksikanıñ “La Jornada” basması Venesuêlada xökümät häm oppoziśiyä arasındağı söyläşülär ber ay êçendä Meksikada uzaçağın xäbär itä.

Argentinanıñ “Clarín” matbuğat çarası il xökümäteneñ “qatnaş vakśina”nı raslawın citkerä. Berençe dozanı Sputnik V bularaq alğannar ikençesendä Moderna yäisä AstraZeneka qadata ala.  

Rusiyäneñ  “Vedomosti” gazetı yazğança, 7 däwlät – Angliya, Franśiya, AQŞ, İrlandiya, Norvegiya, Êstoniya häm Albaniya - Rusiyäne Abxaziyä häm Kön’yaq Osetiyäneñ bäysezlegen qabul itü qararınnan kire qaytırğa çaqırdı.

“İzvestiya” gazetınıñ xäbärenä qarağanda, Xalıqara Olimpiya komitetı Belarus’ sportçısı Kristina Timanovskayanıñ trenerlarına qarata qayber tänqıyt’läwläre säbäple üz ileneñ Olimpiya komitetı tarafınnan mäcbüri qaytarıp cibärelergä teläwe häm näticädä kilep çıqqan waqıyğalar arqasında Minskidan beräwlärneñ diśiplina cawaplılığına tartılaçağın belderde.

“RİA Novosti” agentlığı Rusiyädä xalıqnı här altı ayda ber koronavirusqa qarşı qabat vakśina yasarğa çaqıruların citkerä.

Tatar telendäge “İntertat” agentlığı “Törkiyädä yanğın qotıra” dip isemlängän yazmasında ildäge soñğı wäzğıyät belän şahitlärneñ belderüläre aşa tanıştıra.