Törek matbuğatına küzätü 02.08.2021
2nçe avgust könne çıqqan qayber törek gazetlarına küzätü
“Hürriyet” gazetı Törkiyädän Greśiyägä rizasızlıq belderü turında yaza.
Törkiyä tışqı êşlär ministrlığı çikneñ Greśiyä yağınnan grajdanlı kiyemle keşelär tarafınnan ut açılıp Ädirnädä ber watandaşnıñ üterelüe säbäple Afina idaräsenä iskärtü yasadı.
“Star” gazetı ministr Varank süzläre belän “Yaña êtapqa tizdän küçäçäkbez” dip citkerä.
Sänäğat’ häm texnologiya ministrı Mostafa Varank: “VLP nigezle cirle vakśina kandidatınıñ, watandaşlarıbız fidakar’lege yärdämendä, soñğı noqtasına yaqınlaşabız. 2nçe faza êşçänlege tögällänü aldında, 3nçe faza êtabına tizdän küçäçäkbez. Bu vakśinanıñ yaña variantlarğa qarşı ähämiyätle köçkä iyä bulaçağın küzallıybız,”-dip belderde.
“Yeni Şafak” gazetı “Diñgez töbenä tüşäläçäk ütkärgeç torbaların yasaw başlandı” dip xäbär itä.
Ênergetika häm qazılma baylıqlar ministrı Fatix Dönmäz Qara diñgez gazın çığaruğa az waqıt qaluın, diñgez töbennän suzılaçaq 169 çaqrımlı torbalarnı citeşterä başlawların belderde.
“Habertürk” gazetı yazğança, ministr Varank dön’yadağı iñ zur tere balıq taşu korabınıñ berençe êretep yabıştıru êşen başqardı.
Älege köymä Yalovadağı ber sudno tözü ob’yektında yasala. Anıñ täwge êretep-yabıştıru êşen sänäğat’ häm texnologiya ministrı Mostafa Varank başqardı. Korabnıñ 2023nçe yılda tözelep betep Norvegiyägä êksportlanuı kötelä.
“Sabah” fazetı “İstanbulğa soñğı 16 aynıñ iñ küp turistı iyün’dä kilde” dip citkerä.
İstanbul, ğadäti tormışqa qaytu êtabına kerügä, iyün’dä 684 meñ 621 çit il turistın qunaq itte. Kübese Germaniyädän – 70 meñ 989 keşe. Annan soñ İran, Amerika, Ukraina, Franśiyä häm Rusiyä kilä.
