Törek matbuğatına küzätü 25.05.2021
25nçe may könne çıqqan qayber törek gazetlarına küzätü
“Yeni Şafak” gazetı ilbaşı Ärdoğan süzläre belän “Törkiyä tarixında täwge tapqır” dip yaza.
Törkiyä ilbaşı Räcäp Tayyip Ärdoğan Pol’şa däwläte başlığı Andrey Sebast’yan Duda belän ike il arasında kileşülär imzalağannan soñ urtaq matbuğat cıyılışında bolay dide: “Törkiyä üz tarixında täwge tapqır NATO häm Awrupa Berlege äğ’zası bulğan däwlätkä keşesez hawa apparatları êksportlayaçaq”.
“Star” gazetı Dudanıñ “Törkiyä- regiondağı iñ ışanıçlı berlektäşebez” digän süzlären alğı planğa çığara
Pol’şa ilbaşı Duda Törkiyä belän ike aradağı nıqlı bäyläneşlärgä basım yasap: “NATO qısalarında da ike däwlät bularaq tıştan kilergä mömkin yanawlarğa qarşı tora alaçağıbızğa ışanam,”-dide.
“Sabah” gazetı Qara diñgezdän yaña söyeneçle xäbärne citkerä
Ênergetika häm tabiğıy çığanaqlar ministrı Fatix Dönmäz Sakariya gaz mäydanındağı soñğı wäzğıyät’ xaqındağı belderüendä Qara diñgezdäge êşçänlekkä iğ’tibarnı cälep itte. “Yaña xäbär öçen iyün’ ayın kötik. Êşçänlek iyün’ ayında tögälläner. Filios Qara diñgezneñ tirän su astı borawlaw märkäz bazası xälenä kiläçäk,”-dide ul.
“Habertürk” gazetı Törkiyädän Qıtayğa 6nçı häm 7nçe êksport poyızdlarınıñ yulğa çığuın xäbär itä.
Alar Kocaeli töbägeneñ Kartäpä rayonınnan quzğaldı. Vagonnar biredä yasaluçı melamin belän qaplanğan taqtalar töyägän. Poyızdlar 12 köndä 4 däwlät aşa ütep Qıtayğa barıp citäçäk.
“Hürriyet” gazetı “Turistlar, çikläwlärgä qaramastan, Törkiyädän baş tartmıy” dip yaza
Törkiyä qunaqxanäçelär federaśiyäse räise Sururi Çorabatır: “Mösafirlarıbız başınnan uq alınğan kisätü çaralarınıñ külämen kürüläre häm täq’dim itkän xezmätebezneñ sıyfatın belüläre öçen, illäreneñ çikläwlärenä qaramastan, bezne saylıy,”-dide.
