Törek matbuğatına küzätü 07.05.2021
Qayber törek basmalarına küzätü
“Watan” gazetı yazğança Törkiyäneñ tışqı êşlär ministrı Mäwlüt Çavuşoğlu Törkiyä häm Misır wäkillekläre Qahirädä ütkärgän söyläşülärneñ uñay uzuın häm üzeneñ Misır tışqı êşlär ministrı Samix Şukri belän monnan alda da törle söyläşülär uzdıruın assızıqlap: “Kiläse barışta mönäsäbätlärne cayğa salu öçen yasala alınaçaq adımnar mäs’äläsendä söyläşülär däwam itäçäk,” – dide.
“Xörriyät” basması beldergänçä Törkiyäneñ tışqı êşlär ministrlığı İzrailneñ Yordannıñ Könbatış üzänlegendäge qanunsız toraq punktların kiñäytü tırışlıqlarına qarşı xalıqara cämäğat’çelekne reakŝiya kürsätergä çaqırdı.
“Star” gazetı xäbärenä kürä Törkiyäneñ Fänni häm Texnologik tikşerenü oyışması TÜBİTAK başlığı Professor Doktor Xäsän Mandal törek belgeçläreneñ yaña inaktiv vakŝinasınıñ da Bötendön’ya Sälamätlek saqlaw oyışması isemlegenä kerüen açıqladı. Virusqa oxşaş kisäkçeklärgä tayanuçı vakŝina da bu isemlekkä kergän ide.
“Sabah” basması citkergänçä Törkiyädän yılnıñ berençe 4 ayında yaqınça 1 milliard dollarlık saqlanu häm aviaŝiya sänägäte êşlänmäläre êksportlandı, satışlarda berençe urınnı 386 million 100 meñ dollar belän Amerika Quşma Ştatları aldı.
“Yeni Şafak” gazetı yazğança Törkiyäneñ Mädäniyät häm turizm ministrı yärdämçese Nadir Alpaslan uzğan atnada Törkiyägä kilgän Ukraina wäkillegeneñ “Işanıçlı turizm sertifikatı” programmasınıñ uñışlı buluın äytülären belderep: “Rusiyä belän dä mondıy êşçänlegebez bar. Rus wäkillege belän Ramazan bäyrämennän alda küreşüebez mömkin,” – dide.
