Törek matbuğatına küzätü 17.09.2020
17 sentäbr' könne basılğan qayber törek basmalarına küzätü
“Xäbär türk” gazetı beldergänçä Törkiyä ilbaşı Räcäp Tayyip Ärdoğan Germaniya Kanŝlerı Angela Merkel’ belän videokonferenŝiya ütkärep, Könçığış Urta diñgez mäs’äläsendä qoruçı häm döreslek yaqlı totış bulğanda kileşmäwçänleklärne söyläşep çişä alaçaqların äytte.
Xäbärgä kürä Awrupa illäreneñ Könçığış Urta diñgez mäs’äläsendä ğadel häm totrıqlı buluları zarurlığına işarät itkän Ärdoğan Törkiyäneñ xaqları xosusında täwäkkäl häm aktiv säyäsät alıp barunı däwam itteräçäklären assızıqladı.
“Yeni Şafak” basması yazğança soñğı ber ayda yasalğan 3 Navtex yullaması belän Törkiyäneñ diñgez wäqalät urınnarınıñ iñ kön’yağınnan başlap, tön’yaqqa taba baruçı Oruç Reis köymäseneñ monnan soñğı yünäleşe Meys utrawı bulaçaq.
Xäbärdän kürengänçä Oruç Reisneñ bu töbäktäge tikşerenüläre 2 ayda tämamlanaçaq.
“Star” gazetı citkergänçä Tön’yaq Makedoniya prem’yer-ministrı Zoran Zaev Afinı citäkçelegen Könçığış Urta diñgez mäs’äläsendä Törkiyä belän xezmättäşlekkä çaqırdı.
Gazet yazğança töbäk illäre arasındağı köçle bağlarnıñ ähämiyätenä işarät itkän Zaev: “Aqıllı bulıyq. Bu kiyerenkelek qabatlanmas dip ömetlänäm. Çönki Törkiyä sezneñ kürşegez häm bezneñ dä yaxşı dustıbız,” – dide.
“Sabah” basması xäbärenä kürä İlbaşı idaräseneñ Saqlanu sänägäte räislegeneñ Ber törkem keşesez hawa apparatları texnologiyasen qamilläşterü häm kürsätü proyektı qısalarında oyıştırğan yarışnıñ berençe êtabı tämam.
Xäbärdän kürengänçä oçışlı testlarda şaqtıy şirkät qatnaşıp, üz sälätlären kürsätte. Ber törkem keşesez hawa apparatları texnologiyasen qamilläşterü häm kürsätü proyektı başlığı İsmail Demir Törkiyä saqlanu sänägäteneñ soñğı yıllarda keşesez hawa apparatları belän bäyle zur uñışlarğa ireşüen, milli häm cirle apparatlarnıñ dön’yada üz sıynıfınıñ aldınğı sistemaları arasında urın aluın äytte.
“Xörriyät” gazetı beldergänçä koronavirus kizüendä normal’läşü barışı belän ber rättän Antaliyadağı turist sanında da artış küzätelä.
Gazet yazğança Antaliyada avgust ayında barlığı 225 meñ bulğan Rusiyä turistları sanı sentäbr’neñ berençe 15 könendä dä üzgärmäde. Cäy sezonınıñ noyabr’ğa qadär ozınayaçağı küzdä totıla.
