Törek matbuğatına küzätü 6.02.2020

“Yaña Şäfaq’” gazetı “Rejim çigenmäsä bu êşne şäxsän başqaraçaqbız” dip yaza.

İlbaşı Räcäp Tayyip Ärdoğan İdlibtä törek ğaskärilärenä höcümneñ Törkiyä küzlegennän Süriyädä yaña çornıñ başlanğıçı buluın söyläde. “Törek xärbiyeneñ qanı aqqan cirdä hiçber närsäneñ êlekkeçä däwam itüenä yul quymayaçaqbız,”-dide ul. Ärdoğan rejim fevral’ ayında Törkiyäneñ küzätü noqtalarınnan çigenmäsä, moña mäcbür itäçäklären dä assızıqladı.

“Xörriyät” gazetı “Cirle raketabıznı tiz arada Süriyä çigenä urnaştıraçaqbız” dip belderä.

İlbaşı Ärdoğan cirle mömkinleklär belän yasalğan HİSAR-A raketa sistemasın tizdän qullanılışqa kertäçäklären äytte. Yıraq arağa atuçı hawa saqlanu sisteması Sipernı yasawda da alğa kiteş zur. “Cirle xärbi oçqıçıbız 2023nçe yılda angardan çığaçaq. Törkiyägä F-35lärne birmäw belän yanawçılarğa iñ yaxşı cawabıbız üz milli xärbi oçqıçıbız bulaçaq”- dide Ärdoğan.

“Watan” gazetı xäbär itkänçä, “Süriyä çigenä 100 texnikalı xärbi konvoy cibärelde.  

Süriyädä Bäşşar Äsäd rejimı tarafınnan küzätü noqtasına yasalğan höcümnän soñ Törkiyä qorallı köçläre çik buyı berämleklärenä östämä desantçılar, suğış kiräk-yaraqları häm texnika cibärde. 100 maşinadan toruçı xärbi konvoy çik buyı töbäge Xatayğa barıp citte.

“Star” gazetında mondıy yazma urın ala: “Törkiyädän Awrupa berlegenä yullama: yaña säxifä açu waqıtı citte”.

Tışqı êşlär ministrı Mäwlet Çavuşoğlu Awrupa Berlege êçendä Törkiyägä qarşı tiskäre atmosfera buluın, ışanıçsızlıqnıñ torğan sayın tiränäyüen söyläde. Ul rasaçılıqnıñ Awrupa qıymmätlären tamırdan qaqşata başlawın assızıqladı. “Urta diñgezneñ könçığışındağı gidrokarbon êşçänleklärebez, “Solıx çişmäse” xäräkäte häm Liviyä mäs’älälärendä Awrupa Berlegeneñ qararları mönäsäbätlärebezne kiyerenkeläşterde. Arabızda problema xälenä kilgän bu mäs’älälärdä bağ’lanışlarıbıznı tağın da arttıru kiräk,”-dide ministr.

“Xäbär Türk” gazetı “Törek iq’tisadı çıdam” dip citkerä.

 Qıtayda koronavirus çığu häm dön’ya külämendäge tiskäre küreneşlärgä qaramastan, Törkiyä bazarı çıdam bulıp çıqtı. İstanbul birjası ğıynvar ayında 1,5%qa üste. Xälbüki şul uq çorda üseştä bulğan birjalar 4,7%qa töşte.