Törek matbuğatına küzätü 5.02.2020

“Star” gazetı yazğança, “İdlibtäge höcümnärneñ rejim öçen näticäläre bulaçaq”

Törkiyä ilbaşı Räcäp Tayyip Ärdoğan Süriyäneñ İdlib töbägendäge höcümeneñ xalıqara kileşülärne bozuın belderde. Ul anda Törkiyä qorallı köçläreneñ zarar kürüen häm 8 ğaskärineñ şähit buluın bolay ğına qaldırmayaçaqların, Asad rejimına cawap qaytaraçaqların äytte.  

“Watan” gazetı älege temanı däwam itep “Äsädkä qarşılıq kürsättek, kürsätüne däwam itäçäkbez” dip yaza.

Törkiyä tışqı êşläre ministrı Mäwlet Çavuşoğlu ilneñ armiyäsenä qarşı xıyanätçel höcümnän soñ açıqlaw yasap bolay dide: “Höcümgä cawap qaytardıq, bik küp qorbannarı buldı, bu däwam itäçäk”. Ul Rusiyäneñ “Rejimnı tulısınça kontrol’ itä almıybız” sıltawınıñ da döres bulmawın äytte.

“Xäbär Türk” gazetı “Törkiyäneñ xalqı 83 millionnan arttı” dip xäbär itä.

Törkiyä statistika oyışması ilneñ xalıq sanın açıqladı. Aña qarağanda, ildäge xalıq 2019nçı yılda, annan aldağı yılğa qarağanda, 1 million 151 meñ 115 keşegä artqan häm 83 million 155 meñ täşkil itkän. Alarnıñ 15 million 500 meñnän artığı İstanbulda terkälgän.

“Yaña Şäfaq” gazetı “Koronavirustan qaçuçı ruslar yäşelçä häm ciläk-cimeşne Törkiyädän ala başladı” dip citkerä.

Qıtayda virus taralğannan soñ êksportta Törkiyä tovarlarına taläp 5 tapqır arttı. Qıtaydan ciläk-cimeş häm yäşelçä aluçı illär dä törek bazarına küçte. Rusiyä Törkiyädän pomidor alunı 200 meñ tonnağa citkerü turında dokument xäzerli.

“Sabax” gazetı yazğança, “Törkiyä investiśiyälärdä üzäkkä äwerelä”.

Törkiyädä Angliyä säwdä palatası räise Kris Gont Törkiyä häm İstanbulnıñ Könçığış Awrupa häm Urta Aziyä çeltäre êçendä urın alğan 14 ilneñ üzäge bulaçağın belderde. Ul törek häm ingliz şirkätläreneñ älege däwlätlärgä ireşü öçen êşläyäçägen äytte.