Törek matbuğatına küzätü 19.12.2019

“Yaña Şäfaq” gazetı Ärdoğannıñ süzläre belän “Çäneçkele timerçıbıqlar Awrupanı saqlıy almas” dip yaza.

İlbaşı Räcäp Tayyip Ärdoğan Törkiyäneñ möhacir yögen 9 yıl ber başına kütärüen söyläde. Ul Könbatışnıñ bu mäs’älägä barı tik mänfägat’ häm qurqınıçsızlıq küzlegennän genä qarawın äytä. “Könbatış illäre çäneçkele timerçıbıqlarnıñ Awrupanı möhacir ağımınnan saqlayaçaq şikelle bik yalğış fikergä kildelär. Urta diñgezdä qaçaq köymälären batırdılar häm ul keşelärne suğa kümdelär,”-dide ul.

“Star” gazetı “Awrupa Berlege illäre Törkiyäne yuğarı bäyäli” dip yaza.   

Awrupa Berlege Törkiyä delegaśiyäse räise, ilçe Kristian Berger Süriyädäge wäzğıyät’ne tözätü öçen säyäsi problemalarnı çişü mäs’äläsendä Törkiyä belän ber ük fikerdä buluların belderde. “Monnan tış, här Awrupa Berlege ile Törkiyäneñ küp kenä möhacirne qunaq itüen zur räxmät belän yuğarı bäyäli,”-dide ul.

“Xörriyät” gazetı xäbär itkänçä, “Törek hawa yulları Osakağa säfärlären yañarta”

Aviaşirkät Yaponiyäneñ Osaka şähärenä qabat säfärlär yasıy başlıy. Oçışlar 2020nçe yılnıñ 14nçe aprelennän ğamälgä kerä.

“Watan” gazetı “Törkiyä Liviyä belän kileşengän töbäklärdä neft’ häm tabiğıy gaz êzläyäçäk” dip citkerä  

Ênergetikä häm qazılma baylıqlar ministrı Fatix Dönmäz 2020nçe yılnıñ berençe aylarında neft’ häm tabiğıy gaz êzläw prośessın başlayaçaqların belderde. Ul Liviyä belän kileşüneñ BMO tarafınnan raslanuın kötülären äytte.

“Sabax” gazetı yazğança, “Tradiśion sport törläre dön’yanıñ kön üzägendä”

Bötendön’ya êtnospor konfederaśiyäse prezidentı Bilal Ärdoğan keşelärneñ älege sport törläre belän qızıqsınuın arttırırğa teläwlären belderde. Ul Azärbaycan, Törkmänstän, Qazaxstan, Üzbäkstan, Marokko, Katar, Kön’yaq Amerika illäre, İtaliyä häm Franśiyädäge tradiśion sport çaraların küzätep baruların häm oyışmalar belän bäyläneşkä kerülären citkerde.