Törek matbuğatına küzätü 8.10.2019

“Yaña Şäfaq’ gazetı Ärdoğannıñ “Balkannardağı säyäsätebezne dini nigezdä alıp barmıybız” digän süzlären alğı planğa çığara

Törkiyä ilbaşı Räcäp Tayyip Ärdoğan Serbiyädäge “Politika” gazetına interv’yu birde. Ul anda: “Balkannarnıñ qaysı cirendä bulsa bulsın, bu cirlekneñ barlıq xalıqların, serb, bosniyäle, alban, xorvatnı ayırıp quymıyça, ğasırlar buyı bergä yäşägän, kiläçäktä dä här tarmaqta xezmättäşlek itäçäk duslarıbız bularaq küräbez,”-dide.    

“Xäbär Türk” gazetı yazğança, “Törkiyä Süriyäneñ tön’yağındağı imin töbäkne üze töziyäçäk”

Süriyäneñ tön’yağında imin töbäk tözüdä yaña êtapqa küçtelär. AQŞ Törkiyäneñ operaśiyäsenä yärdäm itmäyäçägen häm qatışmayaçağın belderde.

“Watan” gazetı “Kön’yaq-könçığışta neft’, Trakyada gaz tabıldı” dip yaza

Törkiyä ênergetika häm tabiğıy çığanaqlar ministrı Fatix Dönmäz ilneñ barı tik diñgezdä tügel, cir astında neft’ häm gaz êzläwen däwam itüen belderde. Ul kön’yaq-könçığış Anadoluda - neft’, Trakyada isä gaz tabuların äytte. Äle alarnıñ testları däwam itä.  

“Star” gazetı xäbär itkänçä, “Saqlanu häm aviaśiyä tarmağınıñ êksportı 2 milliard dollarğa yaqınlaştı”

Törkiyäneñ saqlanu häm aviaśiyä tarmağı yılnıñ 9 ayında êksportnı, uzğan yılnıñ şul uq çorı belän çağıştırğanda, 37,7%qa arttırdı. Şulay itep, tarmaq älege çorda tormışqa aşırılğan iñ yuğarı êksport kürsätkeçenä ireşte.

“Sabax” gazetı “Êtnosportta millionnan artıq keşe kilde” dip citkerä

Dön’ya êtnosport konfederaśiyäse tarafınnan İstanbul Atatörk aêroportında oyıştırılğan festival’gä kilüçelär şaqtıy ide. 4 kön barğan çaranı yaqınça 1 million 200 meñ keşe qaradı. Anda 12 tördä tradiśion sport yarışlarınnan tış, törki mädäniyätneñ ähämiyätle öleşe bulğan aş-su,qul êşläre häm balalar uyınnarı da urın aldı.