Törek matbuğatına küzätü 12.04.2019
12nçe aprel' könne çıqqan qayber gazetlarğa küzätü
“Sabax” gazetı yazğança, “Rusiyä S-400neñ qayber öleşlären Törkiyä belän bergä yasarğa mömkin”
Kreml’ süzçese Dmitriy Peskov monıñ mömkin buluın xäbär itte. “S-400 hawadan saqlanu sistemasınıñ barlıq öleşlären Törkiyä belän bergä çığaru turında äytmibez. Bu yaña qoral töre. Ämma qayber öleşlären detal’lär nigezendä Törkiyädä çığaru, älbättä, bulırğa mömkin,”-dide ul.
“Xäbär Türk” gazetı “Törkiyä - Germaniyä säwdä mönäsäbätläre tağın da üsäçäk” dip yaza.
Fevral’ ayında Törkiyäneñ iñ küp êksport yasağan ile Germaniyä buldı. Alarğa 1 milliard 225 million dollarlıq tovar satıldı. Germaniyä-Törkiyä säwdä häm sänäğat’ palatası räise Markus Slevogt beldergänçä, kiläse çorda ike il arasındağı säwdä äyläneşendä artu kötelä.
“Xörriyät” gazetı xäbär itkänçä, “Törkiyä häm Amerikanıñ êşmäkärläre oçraşa”
Älege oçraşu 14nçe-16nçı aprel’ könnärendä Vaşingtonda uzaçaq. Anı AQŞnıñ êşmäkärlär şurası häm Amerikanıñ törek şurası bergäläp oyıştıra. Konferenśiyädä Patriot raketaların çığaruçı oyışma, Apple, Djeneral Êlektrik häm başqa şirkätlärneñ yuğarı däräcäle idaräçeläre qatnaşa.
“Yaña Şäfaq’” gazetı “Turistlar iñ küp aqça tuzdırğan illär bilgele buldı” digän xäbär urnaştıra
Śifrlı media oyışması “Vizual’ kapitalist”nıñ mäğ’lümatlarına qarağanda, çit il turistları 2017nçe yılda Törkiyädä 22 million 500 meñ dollar tuzdırğan. Bu kürsätkeç belän il isemlektä 14nçe urında tora. Berençelek AQŞta. Çit il turistları anda 210 milliard dollardan kübräk aqça tükkän. Şunnan soñ İspaniyä, Franśiyä, Tailand, İtaliyä häm Böyekbritaniyä kilä.
“Star” gazetı yazğança, “Observatoriyä teleskopları Marsqa taba borıla”
Qoyaş sistemasındağı iñ keçkenä planetalarnıñ berse Mars - Cir tışındağı tormış barlığı belän bäyle tikşerenülär nisbätennän gel iğ’tibar üzägendä. Änkara universitetınıñ Krayken observatoriyäse 13nçe aprel’dä xalıq öçen çara oyıştıra. Anda kük yöze belän qızıqsınuçılar Marsnı häm Aynı teleskoplardan küzätäçäk.