Törek matbuğatına küzätü 4.04.2019

“Xäbär Türk” gazetı “Törkiyä S-400lär mäs’äläsendä kire adım yasamayaçaq” dip yaza

Tışqı êşlär ministrı Mäwlet Çavuşoğlu Törkiyäneñ Rusiyädän alaçaq S-400 hawa saqlanu sistemalarınıñ tögällängän kileşü buluın häm monnan kire adım yasamayaçaqların söyläde. Ul älege raketa sistemalarınıñ NATO sistemaların doşman kürmäyäçägen assızıqladı. Monnan tış, ministr F-35 xärbi oçqıçlar yasaw programmasınıñ AQŞnıñ NATO berlektäşlärenä satqan başqa qorallar şikelle bulmawın belderde. Törkiyä - älege programmanıñ ber öleşe.  

“Star” gazetı yazğança, “Germaniyä ênergetikada Törkiyä belän xezmättäşlek itärgä teli”

Germaniyä iq’tisad häm ênergetika ministrı urınbasarı Oliver Vitke beldergänçä, Törkiyä älege ilneñ iñ ähämiyätle iq’tisadi xezmättäşe. Ul ênergetika tarmağındağı bäyläneşlärne arttırırğa teläwen dä äytte. Vitke Törkiyä belän Awrupa Berlege arasında tamğaxanä kileşüeneñ dä yañartıluı kön üzägendä buluın xäterlätte. “Monda ike yaqnıñ da xäräkät itüe belän irekle säwdä öçen berär närsä êşlärgä mömkin. Maxsus törkem monıñ belän şöğıl’länä. Törkiyädäge duslarıbız belän dä bu xaqta söyläşäbez,”-di Vitke.

“Sabax” gazetı “Rusiyä belän säwdädä maqsat 100 milliard dollar” dip belderä

Törkiyä belän Rusiyä iq’tisadi mönäsäbätlärne köçäytüçe çaralarğa tağın berne östi. Törkiyä iyül’ ayında Rusiyäneñ Yekaterinburg şähärendä uzaçaq İnnoprom sänäğat’ kürgäzmäsendä partner däwlät bularaq qatnaşaçaq. İke il arasındağı säwdä äyläneşe 25 milliard dollardan artıq. Maqsat monı 100 milliard dollarğa citkerü. İke il urtaq tışqı säyäsät planı xäzerläyäçäk. Anıñ yärdämendä Törkiyäneñ dä, Rusiyäneñ dä köçle tarafları öçençe däwlätlärneñ bazarlarına çığarılaçaq.

“Yaña Şäfaq’” gazetı xäbär itkänçä, “Xalıqara ayaq kiyeme modası kürgäzmäse işeklären açtı”

Älege tarmaqta iñ zur ikençe çara sanaluçı häm bıyıl 61nçe tapqır oyıştırıluçı kürgäzmä İstanbulnıñ Yäşelköy rayonında işeklären açtı. Anda meñnän artıq marka üzeneñ êşlänmälären kürsätä. Qararğa kilüçelär arasında Rusiyä, AQŞ, Awrupa - barlığı 60 ildän küpläp satıp aluçılar bar. Alar kübräk quldan êşlängän häm maxsus dizayn ayaq kiyemnäre belän qızıqsına. Kürgäzmä 6nçı aprel’gä qadär däwam itäçäk.

“Xörriyät” gazetı “Törkiyäneñ qoş cännäte turistlarğa kürsäteläçäk” dip belderä  

Çista suları, manzarası, üsemlek häm xaywannar dön’yası belän şaqqattıruçı Gölbaşı küle turistlarnı üzenä tartaçaq. Xataydağı älege kül 193 qoş töreneñ yäşäw mäydanı. Ul torğan sayın tabiğat’ belän qızıqsınuçılar, fotorässamnar häm säyäxätçelärneñ yaratqan urınına äwerelä bara. Uzğan yıl kül “Milli ähämiyätkä iyä cir-su mäydanı” bularaq terkälde. Tirä-yünen tözekländergännän soñ ul turistlarğa tanıtılaçaq. Gölbaşı küle - Xatayda uzaçaq Ekspo-2021 çarası waqıtında da küreläçäk urınnar isemlegendä bar.