Törek matbuğatına küzätü 07.08.2018

 “Xäbär Türk” gazetı yazğança “Törkiyä säwdä üzäkläre buyınça Awrupada iñ tiz üsüçe il”

Awrupa säwdä üzäklären üsterü xisabınıñ 2018nçe yılnıñ berençe yartıyıllığı näticäläre bilgele buldı. Anda Törkiyädäge säwdä üzäkläreneñ tuplam mäydanı uzğan yıldan birle 500 meñ kvadrat metrğa artuı äytelä. İl 2017nçe yılnıñ ikençe yartıyıllığında da lider ide.

“Watan” gazetı “Dön’yanıñ iñ zur qoyaş stanśiyäse Kon’yada tözelä” dip xäbär itä.  

Ul Kon’yanıñ Qarapınar ilçäsendä bulaçaq. Zur stanśiyä yılda 1,7 kilovatt säğat’ êlektr ênergiyäse êşläp çığaraçaq. Proyektqa 1,3 milliard dollarlıq investiśiyä yasawları kötelä.  

“Star” gazetında “Zamança Yefäk yulın Qıtay häm Törkiyä üsteräçäk” digän xäbär urın alğan.

“Zamança Yefäk yulı” proyektı uzğan yıl täwge adımnarın yasadı. Ul avtomobil’ yulları, timer yullar, portlar häm êlemtä çıbıqların üz êçenä ala. Proyekt ike il arasındağı säwdä bäyläneşlären köçäytäçäk. Bu êştä çit il valyutasına bäyle bulmas öçen milli aqçalar - törek lirası häm yuan’ qullanılaçaq.

“Yaña Şäfaq” gazetı “Milli xärbi oçqıç kilüen” xäbär itä.

Milli suğışçan oçqıçlar proyektı F-16larnıñ urınına kiläçäk xärbi oçqıçlar tözüne küzallıy. Alarnıñ başlangıç uylap çığaru stadiyäse häm citeşterü ob’yektları öçen Törkiyä aviaśiyä häm ğaläm sänäğate TUSAŞ investiśiyälär yasayaçaq. Moña stimul birü öçen däwlät tarafınnan da finans yärdäme kürsäteläçäk.

“Sabax” gazetı “Pêris Xilton töreklärneñ irtänge aşına xäyran qaldı” dip yaza.

Tanılğan amerikalı model’, cırçı, aktrisa häm yazuçu Pêris Xilton ber çarada qatnaşu öçen Tön’yaq Kipr Törek cömhüriyätenä kilgän ide. Üze tuqtalğan qunaqxanädä bülmäsenä kiterelgän töreklärçä irtänge aşnıñ videosın ul sośial’ çeltärdä urtaqlaştı. Jurnalistlar belän oçraşuda da Xilton säyäxät itärgä yaratuın häm Tön’yaq Kiprğa kilüenä şat buluın belderde. Sänğat’çe tağın çaqırsalar, biregä qabat kilergä äzer buluın äytergä dä onıtmadı.