Törek matbuğatına küzätü 07.05.2018
7nçe may könne basılıp çıqqan qayber törek gazetlarına küzätü
“Xäbär Türk” gazetı: “Törkiyä – Serbiya êşmäkärlek forumı” turında yaza. Çara İstanbulda ilbaşı Räcäp Tayyip Ärdoğan häm Serbiya däwlät başlığı Aleksandr Vuçiç qatnaşında ütte. Anda ike aradağı iqtisadıy bäyläneşlärne üsterü xaqında söyläştelär. Ärdoğan: “2017nçe yılda ike ilneñ säwdä äyläneşe 1 milliard dollardan arttı, bu sannı qısqa waqıt êçendä 2 milliard dollarğa citkerergä, annarı 3 milliard dollar däräcäsenä menärgä maqsat quyabız,”-dide.
“Star” gazetı: “Çavuşoğlu Rusiyä belän viza sistemasınıñ bıyıl öleşçä bulsa da betereläçägen belderde” dip yaza. Törkiyä tışqı êşlär ministrı Mäwlet Çavuşoğlu könüzäk mäs’älälär xaqında ber şäxsi telekanalğa interv’yu birde. Ul Rusiyä tarafının bıyıl vizalarnı öleşçä bulsa da beterergä, anı räsmi häm xezmät pasportına almaştırırğa teläwen söyläde.
“Watan” gazetı “Däwlär kire qayta” yazması belän urtaqlaşa. Anda dön’yanıñ böyek kruiz şirkätläreneñ yulların Törkiyägä taba yünältüe xaqında yazılğan. Royal Caribben kruiz oyışmasınıñ iñ zinnätle korablarınıñ berse Azamara Journey 15nçe mayda Kuşadasına kiläçäk.
“Yaña Şäfäq’” gazetında “Gruziyäneñ awıl xucalığı êş qoralları Törkiyäneke” iseme astında çıqqan mäqalädä ike aradağı mönäsäbätlärneñ cılınuı häm monıñ berençe näticäläre turında süz bara. Gruziyäneñ basu-qırlarnı ağulaw texnikası öçen açqan tenderın Törkiyä şirkäte qazandı. Bu 2 million 622 meñ lira külämendäge êksport digän süz. Texnika Gruziya xökümäte wäkillärenä tapşırıldı.
“Sabah” gazetı “VaqıfBank Awrupa çempionı buldı” mäqaläsendä Törkiyäneñ xatın-qızlar voleybol komandası uñışları xaqında belderä. Alar 4nçe tapqır Awrupa çempionı qaldı. Ciñüçelärne ilbaşı Räcäp Tayyip Ärdoğan da qotladı.
