Törek matbuğatına küzätü 4.07.2017

“Star” gazetı “Yäşeren êmbargolarğa saqlanu proyektları” isemle xäbärendä Törkiyäneň soňğı 15 yılda cirle proyektlar belän saqlanu sänäğätendä şaqtıy alğarış täêmin itüe turında yaza.

Gazet yazuınça, Milgäm proyektınıň 4 nçe köymäse Tuzlada ilbaşı Räcäp Tayyip Ärdoğan qatnaşında tantanalı räweştä diňgezgä cibärelde.

 İlbaşı biredä yasağan çığışında saqlanu sänäğäten cirle, urında citeşterüneň ähämiyätenä basım yasadı. İlbaşı:” Ägär 15 yıl buyı bu tarmaqqa ähämiyät birmäsäk ilbezgä qarata ğamäldä bulğan yäşeren êmbargolar säbäbe belän terrorğa qarşı köräş häm çik ar’yağı operaŝiyäläre başqara almas idek”dide.

“Yäni Şafak” gazetı “Ägäydä Greŝiya höcüme” isemle xäbärendä Greŝiya diňgez köymäläreneň Rodos kiňleklärendä Törkiyä yök köymäsenä ut açuın xäbär itä.

Xäbärdän kürengänçä,16 pulya tigän Törkiyä yök köymäse Marmariska kiterelde. Änkara bu waqiğağa kisken räweştä reakŝiya belderde. Tışqı êşlär ministrlığınıň bu xaqtağı belderüendä tübändäge yullar urın aldı:” İke Törkiyä portı arasında yök taşuçı säwdä maqsatlı häm şuna kürä dä qoralsız köymägä ut açunıň bernindi açıqlawı yuqtır.Mondıy oçraqlarnıň başqa qabatlanmawın telibez”.

”Xörriyät” gazetı” İnflyaŝiya kimede” isemle xäbärendä Törkiyädä inflyaŝiyanıň iyün’ ayında kötelgännärneň kiresenä 0,27%qa kimüen häm yıllıq inflyaŝiyanıň 10,9% täşkil itüen citkerä.

İnflyäsiyanıň kimüenä pomidor, söt, yomırqa, benzin häm mazut bäyäläreneň töşüe yoğıntı yasadı. Bu kimü iyül’ ayında da däwam itärgä mömkin.

”Xäbär Türk” gazetı “AQŞ oçışında noutbuk tıyuı beterelä” isemle xäbärendä Amerika Quşma Ştatlarınıň İstanbul säfärlärendä ğamäldä bulğan noutbuk tıyuınıň irtägä betereläçäge turında yaza.

Xäbärdän kürengänçä, Törek Hawa Yulları ğomum mödire Bilal Êkşi twitter aşa yasağan belderüendä bu tıyunıň 5 nçe iyül’dä beterelüen kötülären citkerde.

”Vatan” gazetı “Cäyge êsse rekordları” isemle xäbärendä metereologiya mağ’lümatlarına kürä ,30 nçı iyün’ -2 nçe iyül’ könnärendä  Könbatış Urta diňgez töbägendä êsse hawa küzätelüen belderä. Soňğı 3 köndä Bodrumda 51 yıldan soň termometrlar yaqınça 50 gradusnı kürsätte.