Törek matbuğatına küzätü

“Yäni Şafak” gazetı “Milli näwbättä” isemle xäbärendä Törkiyä watandaşlarınıñ Fätullahçı terror oyışması äğzase bulğan ğaskärilärneñ tünätereleş kereşüenä qarşı ilneñ här poçmağında demokratiya näwbäteneñ däwam itüen yaza.

Xäbärgä kürä Törkiyä ilbaşı Räcäp Tayyip Ärdoğannıñ “Qurqınıç uzmadı, mäydannarnı buş qaldırmağız” çaqıruın cirenä citkergän meñnärçä watandaş comğa könennän bügengä qadär mäydannarda “demokratiya näwbäte”n totunı däwam itterä.

Gazet yazuınça bäysezlek simvolı bulğan Törkiyä bayraqları belän mäydannarnı tutırğan, demokratiya häm milli iradägä äzerlängän plakatlar da kütärgän watandaşlar Ädirnädän alıp Vanğa, Änkaradan Diyarbakırğa qadär barlıq vilayätlärdä mäydannarnı qızıl-aq töskä qapladı.

“Star” gazetı Fätullahçı terror oyışması FETÖnıñ tüntäreleş kereşüeneñ uñışqa ireşmäwendä şaqtıy ğaskärineñ täwäkkäl totışınıñ tä’sirle buluın yaza.

Xäbärdän kürengänçä tüntäreleşkä kirtä quyarğa telägän qayber ğaskärilärneñ Änkarada ut açqan oçqıçlarğa yağulıq häm kiräk-yaraq töyäwne kire qağuları, oçqıçlarnıñ kütärelep kitülärenä qomaçawlarğa tırışuları öyränelde.

Xäbärgä kürä tüntäreleşçe ofiśerlar tarafınnan ştab bularaq qullanılğan 4nçe Reaktiv oçqıç baza citäkçelegendä oçqıçlarğa bomba häm yağulıq töyäw belän cawaplı personalğa “Törkiyäneñ kiläçäge öçen möhim operatsiya bar” dip äytelgän. Oçqıçnı kontrol itüçe personal bu qısada oçqıçlarnı kiräk-yaraq belän tutırğan.

Gazet yazuınça oçqıçlarnıñ Akıncı bazasınnan kütärelüläre hawa radar citäkçelege tarafınnan raslanğan. Bu normal’ bulmağan wazğiyättän soñ kütärelgän F-16 oçqıçları belän raśiya aşa êlemtä qorırğa tırışqannar. Läkin pilotlar çaqırularğa cawap birmägän. Oçularnıñ qanunsız buluı häm bazalarına qaytuları boyırılğan. Pilotlardan berse: “Ämerne flot citäkçelegennän alırbız,” – diyep, raśiya kanalın yapqan.

“Xäbär türk” gazetı eş dönyasınnan 12 ictimaği oyışmanıñ tüntäreleş kereşüenä qarşı urtaq belderge açıqlawın citkerä.

Xäbärgä kürä beldergedä: “Kereşüne kire çigenderüneñ urta häm ozın möddättä ilebez iqtisadına uñay çağılacağın uylıybız. Bez dä eş dönyası bularaq citeşterüne häm demokratiya näwbäten däwam itteräçäkbez,” – dip äytelgän.

Gazet yazuınça Koç, Sabancı, Akfen, Kuzu Grup, Kibar Holding kebek zur şirkätlär dä “İnvestiśiya däwam itä,” – digän.

“Watan” gazetı “Röxsätsez oçuçığa “Ut aç” ämere” isemle yazmasında Törkiyä ilbaşı Ärdoğannıñ boyırığı belän ildä iminlek maqsatı belän F-16 küzätü oçularınıñ başlatıluın yaza.

Xäbärgä kürä İstanbul iminlek mödire Mustafa Çalışkan da bilgesez barlıq boralaqlarnı bärep töşerü ämeren birde. Marmara töbägendäge oçu tıyuı da 22nçe iyul könenä qadär ozınaytıldı.

Gazet yazuınça xärbi oçqıç yäisä boralaqlar oçuğa yabıq töbäktä röxsät alıp qına oça alaçaq.