Törek matbuğatına küzätü 01.08.2014

“Sabah” gazetı “Bäbilärne üterüçe İzrail” isemle xäbärendä 250dän artıq bala ülgän Ğazzädäge İzrail wähşäteneñ ber snaypernıñ sotsial’ mediada balarnı üterüe belän maqtanuınnan soñ tağın ber tapqır isbatlanuın yaza.

Gazet David Ovadia isemle üterüçe ğaskärineñ İnstagramdağı xisabına “Bügen 13 balanı üterdem,” – dip yazuın citkerä.

“Akşam” gazetı “Hawadan humanitar yärdäm” isemle xäbärendä Tışqı eşlär ministrı Äxmät Dawıtoğlu äytkän “Ğazzägä hawa koridorınıñ qorıluı” barışı belän bäyle neçkäleklärneñ bilgele bula başlawın belderä.

Gazet utnı tuqtatu tä’min iteler itelmäz yaralanuçılarnıñ däwalanuı häm awır xäldä buluçılarnıñ Törkiyägä kiterelüe, Törkiyä häm xalıqara cämğiyättän kilgän yärdämnär belän azıq-tölek, daru, çatır, çista su kebek materiallarnıñ Ğazzägä ireşterelüeneñ qısqa waqıtta qorılaçaq hawa koridorı yärdämendä çınğa aşaçağın xäbär itä.

“Yäni Şafak” gazetı “BMO süzçese üksep yıladı” isemle xäbärendä Berläşkän Millätlär Oyışmasınıñ Fälästin süzçese Chris Gunnessnıñ üz küzläre belän kürgän küpläp üterüne añlatqan waqıtta küz yäşlären tota almawın yaza.

Gazet turıdan-turı efirda üksep yılağan süzçeneñ: “Küreneş bik qurqınıç ide,” – dip äytüen citkerä.

“Milliyät” gazetı “Cir şuışuında ber awıl yuqqa çıqtı” isemle xäbärendä Hindıstannıñ könbatışında küzätelgän musson yañğırları kiterep çığarğan cir şuışuında distälärçä keşeneñ ülüen belderä.

Gazet räsmi zatlarnıñ Maharashtra vilayätenä bäyle 700 keşelek Malin awılında barlıqqa kilgän cir şuışuında 100dän artıq keşeneñ dä haman da balçıq astında buluınnan borçu toyuların citkerä.

Xäbärdä räsmi zatlarnıñ tufraq astında qalğan awıl keşeläreneñ qotılu ömeteneñ azaya baruına işarät itüläre urın ala.

Gazet, ayıruça, Paqıstannıñ Karaçi şähärendä yawğan musson yañğırlarınıñ isä 20dän artıq keşeneñ ğomeren özüen açıqlıy.

“Star” gazetı “Aydın universitetı Awrupa çempionı” isemle xäbärendä Hollandiyada oyıştırılğan häm 35 il qatnaşqan 2nçe Awrupa Universiadasında İstanbul Aydın Universitetındağı İr-atlar tennis komandasınıñ Awrupa çempionı buluın yaza.

Gazet Aydın Universitetınıñ sezon buyı 42 tapqır çempion buluın uquçıları belän urtaqlaşa.