Miçtä sötlaç

Törkiyädä söttän yasaluçı tatlı rizıqları şaqtıy. Alarnı yasaw bik ciňel. Ayıruça kiçke aştan soň sötle tatlılar saylana monda. Ğosmanlı çorınnan birle yasaluçı miçtä sötlaçnı peşerergä öyräterbez bügen sezgä. Söt, döğe häm şikâr qomınnan toruçı sötlaç dönyanıň törle urınnarında yasaluçı dögele pudingka oxşasa da, quyılığı häm yasalışı ayırılıp tora.

Sötlaç öçen tübändäge rizıqlar kiräk:

0,5 stakan döğe

1,5 stakan su

5 stakan söt

3 aş qaşığı döğe onı

1 aş qaşığı kraxmal

1 paket vanilin

1+1/3 stakan şikâr qomı

Miçtä sötlaç yasar öçen başta döğene yaxşılap yuıp, tirän kästrül’gä salabız. Östenä 1,5 stakan salqın su östäp, dögelär yomşarğanğa qadär qaynatabız. Şul arada döğe onı, kraxmal, vanilin häm şikâr qomın ayırım kästrül’dä bolğatabız, sötne äkrenläp östibez häm quyırğançı bolğatabız.

Kästrül’ne utqa quyabız häm däwamlı bolğatıp, qaynatabız. 1-2 minut qaynağannan soň peşkän dögelärne dä quşabız häm quyırğançı bolğatabız. Peşkän sötlaçnı miçkä quyıp bula torğan qasälärgä salıp çığabız häm beraz suıtabız. Annarı qasälärne miç tabasına tezäbez. Tabağa su salabız. Häm 200 däräcädä cılıtılğan miçtä öste qızarğançı 15-20 minut tiräse peşeräbez. Sötlaçlarnı suıtabız.

Aşlarığız tämle bulsın!