Sulı böräk
Törek aş-suları 44
Törek aş-sularında qamırlı rizıqlar bik küp. Alarnı irtӓnge, töşke hӓm kiçke aşta da aşıylar. Ğosmanlı aş-sularınnan miras bulıp qalğan rizıq – börӓk. Börӓk - çüprӓle, êçlekle qamır rizığı. Êçlek bularaq sır, farş, gömbӓ, tawıq, bӓrӓñge, şpinat qullanıla. Miçtӓ peşerep bula anı hӓm mayda da qızdırıp. Bügen sezgӓ törek aş-sularında populyar bulğan “Su börӓge”n peşerergӓ öyrӓterbez.
Börӓk öçen tübӓndӓge rizıqlar kirӓk:
5 stakan on
4 yomırqa
Yartı stakannan ӓzrӓk su
Yartı çӓy qaşığı toz
Yartı stakannan ӓzrӓk êregӓn sarımay
2 litr qaynar su
yartı çӓy qaşığı toz
1 aş qaşığı zӓytün mayı
400 gram aq sır
petruşka
İñ êlek 5 stakan on, 4 yomırqa, yartı stakannan ӓzrӓk su hӓm yartı çӓy qaşığı tozdan qamır yasıybız. Qamırdan 10 keçkenӓ tup tӓgӓrӓtep, östen ber sӓgӓt’kӓ qaplıybız. Şul arada aq sırnı izep, waq turalğan petruşka belӓn bolğatabız. Êçlegebez ӓzer.
2 litr sunı qaynatabız. Qaynağan suğa yartı çӓy qaşığı toz hӓm 1 aş qaşığı zӓytün mayı salabız. Qamır tupların onlanğan qunada uqlaw belӓn miç tabası zurlığında cӓyӓbez. Bu qamırnı qaynağan suda 30-35 sekund peşerep alabız. Peşkӓn qamırnı şunduq salqın su belӓn tulı sawıtqa salabız. 10-15 sekund tirӓse salqın suda köttergӓnnӓn soñ durşlag belӓn alıp, suın yaxşılap sözderӓbez. Miç tabasın sarımay belӓn maylıybız. Qamırlarnıñ bersen tabağa cӓyӓbez hӓm östen 1 qaşıq êregӓn sarımay belӓn maylıybız. Qalğan 4 qamırnı şulay uq cӓyep beterӓbez. 5nçe qamır cӓyelgӓnnӓn soñ êçlekne salabız. Soñğı 5 qamırnı da cӓyep, qaynağan suğa salıp, aralarına sarımay sörtep, tabağa cӓyӓbez. Soñğı qatına sarımaynı kübrӓk salabız. Miçkӓ quyğançı pıçaq belӓn kisӓklӓrgӓ kisep çığabız.
Aldan cılıtılğan 190 gradus miçtӓ öste qızarğançı peşerӓbez. Miçtӓn çıqqan börӓkne cılı kileş tabınğa quyabız.
Aşlarığız tӓmle bulsın!