İslim käbabı

Törek aş-suları diyügä küplärneñ küñelenä “käbap” kiler. Äye, döres, käbaplarnıñ törek rizıq kul’turasında ähämiyätle urını bar. Bu yulı sezneñ belän “islim käbabı” peşerergä öyränäçäkbez. Bu it belän yäşelçälärdän toruçı tämle rizıq. Ul Törkiyädä gastronomiyä başqalası bularaq bilgele Gaziantäp şähärennän çıqqan. 

“İslim käbabı” xäzerläw öçen kiräkle azıq-tölek:

4 danä baklajan

1 stakan sıyıq may

4 danä çerri pomidorı

2 danä yäşel borıç

500 gramm tarttırılğan it

1 danä qırğıçtan uılğan suğan

4 aş qaşığı panirovka onı

2 teş waqlanğan sarımsaq

1 yomırqa

qalaq oçı belän toz, äçe qızıl borıç, änis orlığı häm qara borıç

Sous öçen:

2 aş qaşığı sıyıq may

2 danä uğıçtan çığarılğan pomidor

1 teş waqlanğan sarımsaq

yartı stakan cılı su

ber çemetem toz

qalaq oçı belän qara borıç

Xäzer çirat xäzerläwdä. Başta qabıqları ozınça itep ärçelgän baklajannarnı pıçaq belän 4 ozın telemgä büläbez. Äçe täme betsen öçen yartı säğat’ tozlı suda totabız. Ul arada ittartqıçtan çığarılğan itne ber sawıtqa salabız. Turalğan suğan, yomırqa, soxari wağı, 1 waqlanğan sarımsaq, toz, qızıl äçe borıç, änis orlığı, qara borıçnı şuña östibez häm yaqınça 10-15 minut yaxşılap bolğatabız. Soñınnan älege quşılmadan uç töbendä äwäläp 8 tup yasıybız. Alarnı 2 qaşıq sıyıq may belän tabada äyländergäläp peşeräbez.

Tozlı sudan baklajannarnı alabız häm çista suda çayqatıbız. Annarı qäğaz’ tastımal yäisä çüpräk belän kipteräbez. Tabağa stakannıñ öçtän ike öleşe qadär sıyıq may salıp cılıtabız. Baklajannarnı älege mayda tösläre üzgärgänçe qızdırabız. Annarı artıq mayın qabat qäğaz’ tastımalğa señderäbez.

Yäşel borıçlarnıñ sap öleşlären alıp -  dürtkä, çerri pomidorlarnı - ikegä büläbez.  İke baklajan tasmasın “plüs” tamğası räweşendä berse östenä bersen quyabız. Urtasına itle tupnıñ bersen urnaştırabız, östenä berär kisäk yäşel borıç häm çerri pomidorı quyabız.  Şunnan soñ baklajannarnıñ ikençe oçların berläşterep teşçistartqız tayaq belän berketep quyabız. Barlıq itle tuplarnı şul räweşle töräbez.

Keçkenä sous kästrülendä 2 aş qaşığı sıyıq may cılıtabız. Qırğıçtan çığarılğan pomidor, 1 danä waqlanğan sarımsaq, toz, qara borıç östibez. Barısın 4-5 minut peşerep, astın sünderäbez.

Älege sousnı miç tabasına tezelgän baklajan törgäkläreneñ östenä tügäbez. Rizıqnı aldan 180 gradusqa qadär cılıtılğan miçtä 30 minut peşeräbez. Cılı kileş tabınğa biräbez.