Mücvär

Törek aş-suları - 20

Mücvär

Monnan aldağı tapşırularıbızda törek aş-sularınıñ itsez peşerelgän rizıqlarğa bay buluın söylägän idek. Kübese töp aş urınına tügel, yışraq qabımlıq räweşendä östälgä çığarıla. Alar, başlıça, yäşelçädän tora. Bügen bez peşerergä öyränäçäk mücvär dä şundıylardan. Bu - vegannar bulmasa da, vegetariannar bik räxätlänep aşıy ala torğan rizıq. Törkiyädä anı taşqabaq belän peşerü kiñ cäyelgän. Ämma başqa yäşelçälär belän dä peşerergä mömkin. Bügen bez sezne taşqabaq belän xäzerlängän klassik mücvär peşerergä öyrätäbez.

Başta härwaqıttağıça qullanılaçaq azıq-tölekne sanap çığıyq:

4-5 danä keçkenä yäşel taşqabaq

3 danä tuğ’lap küpertelgän yomırqa

1/3 stakan turalğan petruşka

1/3 stakan turalğan ukrop

1 yarım stakan on

4-5 danä turalğan yäşel suğan

1 stakan waqlanğan aq sır

1 bal qalağı toz

yartı bal qalağı qara borıç

qızdıru öçen yartı stakan zäytün mayı

Şulay uq, yoğurt sousı äzerlärgä kiräk bulaçaq. Anıñ öçen tübändägelär alına:

1 stakan ğadi yoğurt

1 teş sarımsaq

Xäzer çirat mücvärne xäzerläwgä kilep citte.

Başta taşqabaqlarnı êre uğıçtan çığarabız. Rizıqnı sulandırmasın öçen alarnı beraz toz sibep 10 minut totabız. Suı çıqqannan soñ qabaklarnı uçıbız belän sığıp zur sawıtqa salabız. Östenä tuğ’lanğan yomırqa, turalğan yäşel suğan, petruşka, ukrop, toz, qara borıç häm ber stakan tulır-tulmas on salabız. Barısın bergä äybätläp ağaç qaşıq belän bolğatabız. Şunnan soñ ber tirän tabada maynı kızdırabız. Qabaqlı qamırdan ber aş qaşığı zurlığında öleşlär alıp älege mayğa salabız häm qızarğançı totabız. Mücvärlärneñ artıq mayın alu öçen başta qalın käğaz’ salfetkalar östenä quyıp torabız. Annarı tälinkägä tezäbez häm suınğaç östenä sous ağızabız. Sousnı xäzerläw öçen ber stakan yoğurtnı waqlanğan sarımsaq belän tuğ’lıybız.   

Mücvärlär bülmä cılılığında yäisä suıq kileş tabınğa birelä. Aşlarığız tämle bulsın.



Bäyläneşle xäbärlär